د افغانستان د ټاکنیزو شکایتونو کمېسیون وايي، د ټاکنو خپلواک کمېسیون لاهم د خپلو هغو کارکوونکو نوملړ چې په ټاکنیزو درغلیو او سرغړونو کې لاس لري د ټاکنیزو شکایتونو کمېسیون ته نه ده سپارلی.
د ټاکنیزو شکایتونو د کمېسیون د ویاند مرستیالې زرمینې حقجو کاکړ د چهارشنبې په ورځ ازادي راډیو ته وویل، د ټاکنو خپلواک کمېسیون په خپل وخت د دې کار په ترسره کولو کې پاتې راغلی دی.
حقجو زیاته کړه: "متاسفانه د ټاکنو خپلواک کمېسیون د خپلو هغو کارکوونکو نوملړ چې په ټاکنیزو جرایمو تورن دي، د ټاکنیزو شکایتونو کمېسیون ته نه دی سپارلی، هیله لرو چې کمېسیون هر څومره ژر چې کېږي دا نوملړ مونږ ته راولېږي، څو مونږ هم د قانون پر بنسټ خپل کارونه مخته یوسوو. "
د ټاکنو خپلواک کمېسیون د عقرب میاشتې په ۲۵ مه نېټه پرېکړه وکړه چې په ټاکنیزو درغلیو تورن خپل کارکوونکي به د ټاکنیزو شکایتونو کمېسیون ته معرفي کړي.
د دغه کمېسیون په پرېکړه لیک کې له دارالانشا وغوښتل شول چې د دغه کسانو نوملړ د عقرب میاشتې تر ۲۸مې نېټې یعنې د سې شنبې د ورځې تر پایه بشپړ او د ټاکنیزو شکایتونو کمېسیون ته وسپاري.
دا نېټه پرون پوره شوه.
خو اوس د ټاکنو خپلواک کمېسیون ویاند عبدالعزیز ابراهیمي وايي، د دې کسانو نوملړ بشپړ شوی او ژر به یې د ټاکنیزو شکایتونو کمېسیون ته واستوي.
هغه زیاتوي: "تېره ورځ د ټاکنو خپلواک کمېسیون مشرې د هغو کسانو نوملړ لاسلیک کړ چې په ټاکنیزو جرایمو او سرغړونو کې لاس لري، شاید تر نن یا هم سبا دا نوملړ د ټاکنیزو شکایتونو کمېسیون ته واستول شي.
بل خوا بیا د افغانستان پر ټاکنو د څار بنسټ اېټوا وايي، د ټاکنو خپلواک کمېسیون د خپلمنځي ستونزو او شخصي ګټو له کبله نه دی توانېدلی، خپل هغه کارکوونکي چې په ټاکنیزو درغلیو او سرغړونې تورن دي، د ټاکنیزو شکایتونو کمېسیون ته معرفي کړي.
د دغه بنسټ اجراییوي ريیس حبیب الله شینواري: "د ټاکنو خپلواک کمېسیون یا تر سیاسي فشار لاندې راځي، یا هم اداري ستونزې دي، تر خوا یې د کمېشنرانو او دارالانشا ترمنځ اختلاف شته، شاید ادارې فساد هم وي، یا هم کومې شخصي ګټې چې مطرح کېږي، له همدې کبله دوی خپلې ژمنې نه شي عملي کولای. "
دا په داسې حال کې ده چې ولسمشرۍ ته یو شمېر نوماندانو په ځلونو له ټاکنیزو کمېسیونونو غوښتي، چې په ټاکنیزو درغلیو کې له ښکېلو کسانو سره قانوني چلند وکړي.
د افغانستان د ولسمشرۍ ټاکنې د روان لمریز کال د میزان میاشتې په شپږمه نېټه ترسره شوې.
