په ختیځ ولایت ننګرهار کې د یوه ډاکټر تر وژل کېدو وروسته، د افغانستان د طبي ټولنو فدراسیون له دولت څخه غواړي چې د ډاکټرانو د ژوند خوندي کولو لپاره لازم ګامونه پورته کړي.
لسګونو معترضو ډاکټرانو نن (یکشنبه، وږي ۲۴مه) په کابل کې اعتراضیه غونډه وکړه او له دولت څخه یې وغوښتل چې د ننګرهار د ډاکټرانو اتحاديې د مشر نوروز شینواري وژونکي ونیسي.
د غونډې ګډونوالو خبرداری ورکړ که د دوی خوندیتوب ته جدي پام ونه شي، نو په ټول هېواد کې به کاري اعتصاب وکړي.
د افغانستان د طبي ټولنو د فدراسیون غړي فیاض صافي وویل: "له اوسني حالت څخه زموږ صنف او ولس خوشحاله نه دی. موږ غواړو چې دغه اوسني حاکم حکومت په دې برخه کې جدي پاملرنه وکړي."
ډاکټر نوروز شینواری د تېرې دوشنبې په ورځ (وږي ۱۸مه) په جلال اباد ښار په انګور باغ سیمه کې په یوې چاودنې کې ووژل شو.
نوموړي په ننګرهار کې د ارتوپیدۍ یا هډوکو د متخصص ډاکټر په توګه دنده ترسره کوله. تراوسه د هغه د وژنې مسوولیت هېچا پرغاړه نه دی اخیستی، خو د افغانستان د طبي ټولنو فدراسیون غړي ادعا کوي چې سیمه ییز چارواکي یې په وژنه کې لاس لري.
د نوموړي تر وژل کېدو وروسته ننګرهار کې ډاکټرانو کاربندیز وکړ او تېره ورځ ناوخته یې په مشروط ډول خپل فعالیتونه له سره پیل کړل.
د افغانستان د عامې روغتیا وزارت چارواکي ډاډ ورکوي چې دوی د ډاکټرانو د حقونو او امنیت د تامین په برخه کې هرډول همکارۍ ته چمتو دي.
ددغه وزارت سلاکار احمدجان نعیم ازادي راډیو ته وویل، د عامې روغتیا وزارت په ننګرهار کې د ښاغلي شینواري د وژل کېدو قضیه له جمهوري ریاست سره شریکه کړې ده.
هغه وویل: "د عامې ورغتیا وزارت په دې برخه کې له فدراسیون سره ولاړ دی، تر څو د د ډاکټرانو هغه حقوق چې دوي ورته اړتیا لري، ترلاسه یې کړي."
هدفي وژنې یوازې د ننګرهار او د ډاکټرانو ستونزه نه ده، بلکې دغې لړۍ په پلازمېنې کابل او ډېرو نورو ولایتونو کې هم خلک اندېښمن کړي دي.
سره له دې چې امنیتي ادارې د جنایتکارانو پروړاندې د جدي اقداماتو خبره کوي، خو لا هم نه دي توانېدلي چې ددغو وژنو مخه ونیسي.
