د لاسرسۍ وړ لېنکونه

تازه خبر
سه شنبه ۲۱ زمری ۱۳۹۹ کابل ۰۶:۵۱

ټرمپ: حمزه بن لادن د افغانستان او پاکستان پر ګډه پوله په پوځي عملیاتو کې وژل شوی


د اسامه بن لادن زوی حمزه بن لادن

د امریکا د متحدو ایالاتو ولسمشر ډونالد ټرمپ ویلي، دوی اوس تأییدولی شي چې د اسامه بن لادن زوی حمزه بن لادن د افغانستان او پاکستان پر ګډه پوله په پرتو سیمو کې په پوځي عملیاتو کې وژل شوی دی.

د سپیني ماڼۍ په بیان کې چې پرون د سپټمبر په څوارلسمه خپور شو، د ولسمشر ټرمپ په حواله پکې لیکل شوي: د حمزه بن لادن له منځه تګ د القاعده شبکې هغه سمبولیک ارتباط چې دې ډلې د هغه له پلار سره درلود، شلوي، هغوی د رهبرۍ له مهمو مهارتونو محروموي او د دې ډلې مهم عملیاتي فعالیتونه هم کمزوري کوي.

نړیوالو رسنیو د جولای په ۳۱مه د امریکا د استخباراتو د پټو سرچینو په حواله وویل چې حمز بن لادن مړ شوی دی.

خو هغه وخت چا د حمزه بن لادن د مړګ د ځای یا نېټې په اړه معلومات نه وو ورکړي.

د امریکا دفاع وزیر مارک ايسپر په اګست کې د حمزه بن لادن د مرګ خبر تأیید کړ.

خو ولسمشر ټرمپ او د امریکا د حکومت نورو لوړرتبه چارواکو لا دا خبر نه و تأیید کړی.

د رپوټونو پر اساس، اسامه بن لادن ۲۰ اولادونه درلودل.

اسامه بن لادن
اسامه بن لادن

حمزه بن لادن د هغه پنځلسم اولادو او د اسامه د درېیمې ښځې زوی و.

داسې ګڼل کېږي چې حمزه بن لادن د مرګ په وخت دېرش کلن و.

د امریکا حکومت د روان کال په فبرورۍ میاشت کې اعلان وکړ چې د حمزه بن لادن پر سر یې یو ميلیون ډالر جایزه ايښې ده.

اسامه بن لادن د ۲۰۱۱ میلادي کال په مې میاشت کې د پاکستان د پلازمېنې په څو کلیومترۍ کې د امریکا د خاصو ځواکونو په پوځي عملیاتو کې ووژل شو.

حمزه بن لادن ته د "جهاد ولي العهد" لقب ور کړل شوی و.

هغه په غږیزو او تصویري پیغامونو کې پر امریکا او نورو هېوادونو د حملو او د خپل پلار د قتل د غچ اخیستلو خبره کړې وه.

د روان کال په مارچ میاشت کې سعودي عربستان اعلان وکړ چې له حمزه یې د سعودي د تابعیت حق اخیستی دی.

ریاض په دې اړه نور جزیات نه دي ورکړي.

حمزه بن لادن
حمزه بن لادن

سعودي عربستان په ۱۹۹۴ میلادي کال کې له اسامه بن لادنه هم د سعودي عربستان د تابعیت حق اخیستی و.

ملګرو ملتونو په ۲۰۱۸ میلادي کال کې یو رپوټ خپور کړ او په کې ویې ویل چې د القاعده شبکې د حمزه بن لادن په ګډون د نويو رهبرانو د روزنې لپاره پروپاګند پیل کړی.

ملګرو ملتونو ویلي وو چې القاعده غالباً هڅه کوي چې د ځوانې رهبرۍ په رامخکې کولو پلویان ور غونډ کړي.

د اسامه بن لادن تر وژل کېدو وروسته د القاعده شبکې مشري ایمن الزواهري ته وسپارل شوه چې په خټه مصری دی.

د رپوټونو پر اساس، ایمن الزواهري هم د افغانستان او پاکستان د ګډې پولې پر امتداد په پرتو سیمو کې پټ دی.

XS
SM
MD
LG