د کابل ښار په ځان وژونکې حمله کې لس کسان مړه او ۴۲ ټپیان شول.
کابل ښار د پنجشنبې په ورځ له غرمې مخکې د ۱۰بجو او لسو دقیقو موټربم چاودنې سخت ولړزاوه.
دغه حمله د نهمې امنیتي حوزي اړوند د شش درک په سیمه کې د مایکروریانو پر واټ د ملي امنیت د تالاشۍ پوستې ته څېرمه وشوه.
عیني شاهدان وايي، له حملې وروسته د سیمې خلک ترهیدلي وو.
د دول له ډلې یوه عیني شاهد ازادي راډيو ته وویل: زه له حادثې کابو سل متره لېرې وم، په کار بوخت وم چې چاودنه وشوه، اور او لمبې خورې شوې، خلک هرې خوا ته پراته وو.
د افغانستان ولسمشر محمد اشرف غني، اجرائیه رئیس عبدالله عبدالله، په افغانستان کې د امریکا سفیر جان بس او د افغانستان لپاره د ناټو ملکي استازي نیکلاس کې، دغه حمله غندلې ده.
ولسمشرۍ ماڼۍ د ولسمشر غني له قوله په یوې اعلامېې کې لیکلي چې سوله به له طالبانو سره چې اوس هم زموږ د بېګناه خلکو له وژلو لاس نه اخلي، ډېره ستونزمنه وي.
اعلامیې ویلي چې نړیواله ټولنه باید د طالبانو کړنو ته په کتو وپوهېږي چې له څه ډول جنایتکارې او سړي وژونکي ډلې سره د معاملې په حال کې ده.
بل خوا اجرائیه ریاست د عبدالله عبدالله له قوله لیکلي چې طالبان په کابل کې د حملو د زیاتولو له لارې غواړي چې د سولې په مذاکراتو کې امتیاز واخلي.
د کورنیو چارو وزارت د معلوماتو له مخې، په دغه حمله کې ۱۰ کسان وژل شوي او ۴۲ ټپیان شوي دي.
د دغه وزارت ویاند نصرت رحیمي وايي: په دغه ترورېستي حمله کې چې د یوه تونس موټر په ذریعه د مکروریانو په عمومي جاده کې عبدالحق څلورلاري ته نږدې وشوه، ۱۰ ملکي کسان په کې وژل شوي او ۴۲ ټپیان شوي دي.
د ناټو غوڅ ماموریت وايي، په دغه حمله کې د دوی دوه کسان چې یو یې د امریکا او بل یې د رومانیې تبعه وو، هم وژل شوي دي.
د دغې حملې مسؤلیت طالبانو منلی دی.
د طالبانو ویاند ذبیح الله مجاهد په خپله توېټرپاڼه کې لیکلي چې د دغې ځان وژونکې حملې هدف د بهرنیو ځواکونو د وسایطو کاروان و.
په ټولنیزو شبکو کې چې د پټو کمرو په ذریعه کوم تصویرونه اخیستل شوي، ښيي چې یو ټونس موټر په عمومي جاده کې موانع ورانوي او د ملي امنیت د تالاشۍ په ځای کې نه ودرېږي او ځان وژونکی چاودېدونکو موادو ته چاودنه ورکوي.
د افغانستان د کورنیو چارو وزارت وايي، په دغه حمله کې د ملکي کسانو څه باندې لس موټر ویجاړ شوي دي.
په تېرو څلورو ورځو کې دا دوهمه حمله ده.
د دوشنبې په شپه د نهمې حوزې اړوند د قابل بای په سیمه کې موټربم حملې ۱۶ کسان ووژل او ۱۱۹ یې ټپیان کړل.
راپور: خان محمد سیند
د افغانستان د جمهوري ریاست دفتر په کابل کې نننۍ حمله په سختو ټکو غندلې ده.
د ارګ په خبرپاڼه کې په بې ساري ډول وسله وال طالبان یوه وحشي، جنایتکاره، فاسده، منافقه او خونخواره ډله بلل شوې ده.
له ارګه په خبرپاڼه کې چې نن د سپټمبر په پنځمه خپره شوه، ویل شوي چې له نړیوالې ټولنې توقع لري چې د دې ډلې اصلیت ته متوجې شي.
د افغانستان حکومت په داسې مواردو کې اکثر وسله والو طالبانو ته د افغانستان د دښمنانو خطاب کړی، خو لومړی وار یې هغوی نړیوال ترورېستان بللي دي.
د افغانستان ولسمشر محمد اشرف غني په دې بیان کې ویلي: له دې ډلې (طالبانو) سره سوله بې معنی ده، ځکه هغوی سوله نه پېژني او نه باور ورباندې لري.
دا په داسې حال کې ده چې د افغانستان د سولې لپاره د امریکا د حکومت خاص استازی زلمی خلیلزاد په کابل کې دی.
د افغانستان حکومت پرون هم ویلي وو چې د سولې ملاتړ کوي، خو د وسله والو طالبانو او امریکا ترمنځ د سولې د تفاهم په اړه اندېښنه لري.
د ناټو د غوڅ ملاتړ مأموریت وايي چې د کابل ښار د نهمې امنیتي حوزې په شش درک سیمه کې د دغه مأموریت ۲ غړي وژل شوي دي.
دغه مأموریت زیاتوي، له وژل شویو کسانو یو امریکايي او بل هم رومانیايي وګړي دي.
د افغانستان د ولسمشر ویاند صدیق صدیقي په کابل کې د نننۍ حملې په اړه لیکلي چې نړۍ باید دا خاموشي ماته کړي.
صدیقي نن په یوه ټوېټ کې لیکلي: د طالبانو نړیواله ترورېستي ډلې نن بیا په یوه ګڼ مېشته سیمه کې پر خلکو حمله وکړه، موږ په امنیتي کمره کې اخیستل شوی فلم وکوت او ومولیدل چې څوک هدف شول.
په کابل کې د امریکا سفیر جان بس هم حمله غندلې او په یوه ټوېټ کې یې لیکلي چې د داسې بې مفهومه حملو د پای ته رسېدو وخت لا کله و او ویلي یې دي چې د پېښې د قربانیانو له کورنیو سره خواخوږي لري.
د افغانستان لپاره د ناټو ملکي استازي نېک کې لیکلي چې وسله والو طالبانو بیا په داسې تشدد لاس پورې کړ چې په هغه کې یې ملکي او غیر ملکي ته پام نه دی کړی او د وسله والو طالبانو له لوري تشدد یې چې د نېک کې په وینا، د سولې له پروسې سره هېڅ مرسته نه شي کولی، غندلی دی.
نېک کې لیکلي: ناټو د افغانستان له خلکو او امنیتي ځواکونو سره کلکه ولاړه ده.