د ولسمشریزو انتخاباتو د کمپاینونو په اتمه ورځ دغو ټاکنو ته نوماند سید نورالله جلیلي هم د يوې غونډې په ترڅ کې خپلو پلویانو ته خپل پلانونه او پروګرامونه وړاندې کړل.
د ښاغلي جلیلي په مشرۍ د وطن مور په نوم ټاکنیزه ډله شپږم ټیم شو چې نن یې رسماً خپلې ټاکنیزې منډې ترړې پیل کړې.
سید نورالله جلیلي د يکشنبې په ورځ د لویې جرګې په خېمه کې د خپلو پلویانو په منځ کې ژمنه وکړه چې په رښتیني توګه به د خپل هېواد د ابادۍ او سرلوړۍ لپاره کار کوي او افغانستان به د پردیو له احتیاج او ګدايۍ وباسي.
ده وویل: زه غواړم افغانستان له دې حالته وباسم، افغانستان په درواغو، لافو او د خلکو په سترګو کې د خاورو په شیندلو نه جوړېږي، د رهبر يو خصلت دا دی چې باید درواغ ونه وايي، زما تاسو ته اجازه ده چې زما په يو درواغ ما سنګسار کړئ.
د وطن مور ټاکنیز ټیم مشر ټینګار وکړ چې د بریالي کېدو په صورت کې د امریکا پنځه ميلیارده مرسته بندوي او دوه تابیعته خلکو ته دلته د اوسېدو اجازه نه ورکوي.
د ده په خبره، په افغانستان کې قانون ټرافیکي نښه ګرځېدلې چې خلک یې سور، شین او زېړ رنګ ته نه ګوري او بېغمه ترې اوړي، خو دی وايي چې واک ته د رسېدو په صورت کې به په ټولو يو شان قانون پلی کړي.
دا په داسې حال کې ده چې د محمد حنیف اتمر په مشرۍ د سولې او عدالت ټاکنیز ټيم په ګډون تر دې مهاله ۱۲ نورو انتخاباتي ټیمونو هېڅ کمپایني غونډه نه ده کړې.
بل خوا له انتخاباتو څخه د څار يو شمېر بنسټونه، د چارو شنونکي او عام خلک د ولسمشریزو انتخاباتو د کمپاینونو د پڅوالي خبره کوي او د ولسمشریزو انتخاباتو له نوماندانو غواړي چې په مرکز کابل او نورو ولایتونو کې د کمپایني غونډو له لارې خلکو ته خپلې تګلارې او برنامې وړاندې کړي.
له قانون او انتخاباتي مهالوېش سره سم د جمهوري ریاست کاندیدان شپېته ورځې وخت لري چې خپل پلانونه په غونډو، بینرونو او بېلابېلو نورو لارو خلکو ته واضح کړي.
سید نورالله جلیلي دا ژمنه هم وکړه چې د ده په حکومت کې به څو وزارتونه ښځو ته په داسې ډول ورکړل شي چې له وزیرې یې نیولې تر ساتونکي پورې به یې ټولې ښځې وي.
خو د افغانستان د ښځو د شبکې غړې روشن څړن بیا د ښاغلي جلیلي دغه ژمنه تر ډېره عملي نه بولي، هغه وايي: هر څوک چې هر څه وايي، خلک او ښځې پرې ښه پوهېږي چې څومره عملي بڼه لري، دا چې د يوه وزارت ټول کارکوونکي دې ښځې وي، دا ماته ډېر عملي نه ښکاري، نو په تشو خبرو موږ نه خپل حقونه ترلاسه کولای شو او نه هم بل چاته د هغه حق ورکولی شو.
اغلې څړن د ولسمشریزو انتخاباتو له ټولو نوماندانو غوښتنه کوي چې له داسې ژمنو دې ډډه وکړي چې عملي کېدل یې ناشوني وي.
دا وايي، د کمپاینونو پرمهال اکثره وخت نوماندان ډېرې لویې ژمنې له خلکو سره کوي، خو کله چې واک ته ورسېږي، بیا ترې هر څه هېر وي.
