د بدخشان ځايي چارواکي وايي، د دې ولایت کران او منجان ولسوالۍ طالبانو نيولې ده.
د بدخشان ولایت امنیه قوماندان اسدالله محمدي ازادي راډیو ته وويل، د طالبانو د حملو په نتيجه کې دولتي ځواکونو، امنیه قوماندانۍ او د کران او منجان ولسوالۍ پرېښودې او یوې تپې ته وختل.
د ښاغلي محمدي په وینا، طالبان تر اوسه نهدي توانېدلي چې د ولسوالۍ او قوماندانۍ ودانيو ته ننوځي او پهدغه ځای کې سخته نښته روانه ده.
د بدخشان د امنیه قوماندان همداراز وویل، نښتې له پرون راهیسې دوام لري او طالبانو ته تلفات اوښتي دي، خو د لارې د اوږدوالي او ټیلیفوني اړیکو د قطع کېدو له کبلهیې په اړه دقیق معلومات نهدي مشخص شوي.
په همدې حال کې د بدخشان د ولایتي شورا یوه غړي جاوېد مجددي ازادي راډيو ته وویل، طالبانو د یوه کلي په استثنا د کران او منجان ولسوالۍ سیمې نيولې دي.
وسلهوالو طالبانو تر اوسه پهدې اړه څه نهدي ويلي.
کران او منجان ولسوالۍ د بدخشان له هغو لیرې پرتو ولسوالیو څخه ده چې نورستان، پنجشیر، تخار ولایتونو او پاکستان سره پوله لري.
تر دې څلور کاله مخکې وسلهوال طالبان توانېدلي و چې د کران او منجان ولسوالۍ ونيسي.