د لاسرسي لېنکونه

جمعه ۲۹ وږی ۱۳۹۸ کابل ۰۴:۴۲

افغان ولسمشر: موږ له طالبانو د تسلیمۍ کوم لیک نه دی غوښتی، بلکې مذاکرات مو غوښتي


افغان ولسمشر محمد اشرف غني

افغان ولسمشر وايي، سوله زموږ هدف دی او تر موږ هېڅ څوک په افغانستان کې د سولې د ټینګښت لپاره کلکه اراده نه لري.

ولسمشر محمد اشرف غني وايي، په داسې حال کې چې تر راتلونکو څو ورځو پورې د سولې خبرې پيلېدونکې دي، تاوتریخوالي د دغه بهیر پر وړاندې خنډونه رامنځته کوي.

ولسمشر محمد اشرف غني د شنبې په ورځ د کابل ښار په ملي سمپوزیم کې د وینا پرمهال وویل، چې سوله د افغانانو بنسټيزه اړتیا ده او حکومت د سولې د ټینګښت لپاره کلکه اراده لري.

ده وویل: موږ له طالبانو د تسلیمۍ کوم لیک نه دی غوښتی، بلکې مذاکرات مو غوښتي، هغه هم باعزته او تلپاتې سوله، دوی هم باید دا ومني چې دوی له هغو افغانانو سره مخامخ دي چې د سولې اراده لري.

ولسمشر پر کابل پوهنتون د جمعې د ورځې حملې ته په اشارې سره چې ۸ کسان په کې ووژل شول او ۳۳ نور ټپیان شول وویل، چې په عامه ځایونو او ملکي وګړو بریدونه په تمدن او دین برید دی او هغوی چې د دغو بریدونو مسؤلیت په غاړه اخلي له دینه بې خبره دي.

ولسمشر په داسې حال کې په هېواد کې د سولې د ټينګښت لپاره د کلکې ارادې خبره کوي، چې وسله وال طالبان له افغان حکومت سره تردې مهاله مستقیمو خبرو ته نه دي چمتو شوي.

خو په دې وروستیو کې په دوحه کې د افغان سیاسیونو او د طالبانو د غړو ترمنځ د سولې بین الافغاني خبرې شوي، چې د حکومت او خلکو هیلې یې راټوکولي.

په ورته وخت کې د ولسمشر دوهم مرستیال سرور دانش د شنبې په ورځ په کابل کې يوې غونډې ته وویل، تر کومې چې وسله وال طالبان اوربند ونه کړي او له افغان حکومت سره خبرو ته حاضر نشي، د سولې په اړه هر ډول هڅې او خبرې تر شعار اخوا بل څه نه دي.

د افغان ولسمشر دوهم مرستیال سرور دانش
د افغان ولسمشر دوهم مرستیال سرور دانش

ده وویل: تر کومې چې دغه ډله خپله جنګي ستراتيژي بدله نه کړي، له جګړې لاس وانخلي او اوربند ونه کړي، دا شان له افغان حکومت سره بین الافغاني مذاکراتو ته کېنني، د سولې په اړه هر ډول خبرې کول له منځپانګې خالي شعار او نړیوالو ته فریب ورکول دي.

ښاغلی دانش وايي، که طالبان فکر کوي، چې یوازې له امریکا سره د مذاکراتو له لارې سولې ته رسېږي دا يو خیال دی.

بل خوا د سولې لپاره د ځوانانو موسسې د دوحې د بین الافغاني ناستې د ګډ پرېکړه ليک په اړه د ځوانانو د لیدلوري په نوم غونډه کې له دغه پرېکړه لیکه د ملاتړ ترڅنګ د سولې په روان بهیر کې د ځوانانو پر رول ټينګار وکړ.

د دغې موسسې رئیس بلال احمد نیازي وویل، چې سولې ته د رسېدو په لار کې د دوحې ګډ پرېکړه لیک يو ښه پرمختګ دی، خو په دې برخه کې لا ډېرو بحثونو او او بین الافغاني مذاکراتو ته اړتیا ده.

خو په دوحه کې د بین الافغاني ناستې ګډونواله انارکلي هنریار وايي، که څه هم طالبانو په دغه ناسته کې د ملکي وګړو د خوندیتوب ژمنه وکړه، خو بیا هم دغې ډلې په کابل او کندهار کې ملکیانو ته مرګ ژوبله واړوله.

خو طالبانو بیا په خپلو حملو کې ملکیانو ته د دوی له خوا د مرګ ژوبلې د اړولو موضوع رد کړې ده.

XS
SM
MD
LG