د مصر پخوانی ولسمشر محمد مُرسي پرون دوشنبه مړ شو.
د مصر لوی څارنوال ویلي چې مُرسي په قاهره کې د محکمې په پنجره کې له خبرو وروسته بېحاله شو.
د مصر د حکومت په یوه خبرپاڼه کې ویل شوي چې د مُرسي مړینه په روغتون کې تأیید او اعلان شوه.
محمد مُرسي د ۲۰۱۲ میلادي کال په جون کې د مصر د ولسمشر په توګه لوړه وکړه.
ده د وفادارۍ په لوړه کې اساسي قانون او د خلکو د ګټو د بشپړې ساتنې ژمنه کړې وه.
۶۷ کلن مرسي د مصر لومړنی ولسمشر و چې د ازادو انتخاباتو له لارې واک ته ورسېد، خو د ده حکومت زیات دوام ونهکړ.
د مصر پوځ په ۲۰۱۳ میلادي کال د مُرسي له واک ته رسېدو یو کال وروسته په پراخو اعتراضونو پسې هغه له واکه لیرې کړ.
مُرسي له هماغه وخته بندي و او څو وارې په بېلابېلو تورونو محکمې ته حاضر کړای شوی و.
مُرسي پرون دوشنبه یو وار بیا محکمې ته حاضر شو.
د مصر دولتي ټلوېزیون ویلي چې د مُرسي د محاکمې غونډه د نوموړي د جاسوسۍ د تورونو په اړه وه او دې تورونو د فلسطین له حماس اسلامپالې ډلې سره د ده له مشکوکو تماسونو سرچینه اخیسته.
د مصر لوی څارنوال ویلي چې مُرسي د محکمې په پنجره کې له خبرو وروسته بېحاله شو.
د مصر حکومت په یوه خبرپاڼه کې ویل شوي چې مُرسي روغتون ته یووړل شو او هلتهیې مړینه تأیید شوه.
په خبرپاڼه کې همداراز راغلي چې د مرُسي طبي راپور ښيي چې نوموړي په وروستیو کې په بدن کې هېڅ ټپ نهدرلود.
مُرسي د اخوانالمسلمین د ممنوع شوي ګوند یو وتلی مشر ګڼل کېده.
د بشري حقونو د څار ډلې د مرسي مړینه یوه داسې غمیزه بللې چې له وړاندې څخهیې اټکل کېده، ځکه چې د دې مؤسسې په وینا چارواکو د مُرسي د درملنې غم نهخوړ.
په لندن کې د اخوانالمسلمین یو مشر محمد سودان وايي، د مُرسي مړینه مخکې تر مخکې تنظیم شوی قتل دی.
د ترکیې ولسمشر رجب طیب اردوغان چې له مُرسي سرهیې نږدې اړیکې لرلې، مرسي شهید بللی دی.
