د افغانستان د سولې پروسې لپاره د امریکا د بهرنیو چارو وزارت ځانګړي استازي زلمي خلیلزاد د سې شنبې په ورځ بلخ ته د خپل سفر په ترڅ کې له طالبانو سره د بینالافغاني خبرو د پیل په څرنګوالي له افغان سیاستوالو سره غږېدلی.
ښاغلي زلمي خلیلزاد بلخ ته پهدې سفر کې د جمعیت ګوند له اجرائیه مشر عطا محمد نور او د افغانستان د خلکو د وحدت ګوند له مشر محمد محقق سره په مشترک ډول څو ساعته ناسته وکړه.
محمد محقق د سې شنبې په ماښام له ازادي راډیو سره په یوه مرکه کې وویل چې داوړو لورو د افغانستان د سولې په باب د بینالافغاني خبرو د پیل په څرنګوالي، د افغان سولې په باب د نړیوالې اجماع په رامنځته کېدو او په هېواد کې د جمهوري ریاست د ټاکنو په ترسره کېدو خبرې وکړې.
خلیلزاد بلخ ته په سفر کې د سولې د بینالافغاني خبرو په څرنګوالي بحث وکړ.
ښاغلي محقق ازادي راډیو سره په خبرو کې تمه وښوده چې ډېر ژر به په دوحه کې د بینالافغاني خبرو بهیر پیل شي او طالبان باید د هېواد د سیاسي وضعیت په درک کولو سره د سولې دا راز خبرو ته غاړه کېږدي.
محقق وویل په افغانستان کې د سولې لپاره د نړیوالې ټولنې مرسته اړینه ده او پهدغه هېواد کې د ترورېستي اعمالو ختمېدل، پهدې معنی دي چې په نړۍ کې نورو هېوادونو ته له دې ځایه د بشري ضد جنایاتو متوجې ګواښ هم ختم شي.
هغه زیاته کړه: "که څه هم کوم کسان او یا هېوادونه د سیمې په کچه یا هم د نړۍ په کچه په خپلو کې ښه مناسبات نهلري، خو د افغانستان په قضیه کې چې دا په ټوله نړۍ پورې تړلې موضوع ده او د بشریت، افراطیت او ترورېزم په اړه موجوده ستونزه ده، ټول باید لاس سره یو کړي، څو دلته په افغانستان کې سوله تأمین شي."
د بلخ پخواني والي او د جمعیت ګوند اجرائیه رئیس عطا محمد نور مطبوعاتي دفتر هم ازادي راډیو ته په یوه استولي پيغام کې ویلي؛ له خلیلزاد سره د طالبانو او امریکا ترمنځ د سولې د روانو خبرو د څرنګوالي سربېره د افغانستان د ولسمشریزو ټاکنو په باب هم بحث شوی.
ښاغلي نور هیله ښودلې چې د سولې د بینالافغاني خبرو بهیر تر ولسمشریزو ټاکنو مخکې بشپړ شي.
د بلخ د ولایتي شورا مشر افضل حدید هم چې تېره ورځ د افغانستان د سولې لپاره د امریکا د بهرنیو چارو وزارت له ځانګړي استازي سره کتلي، وايي چې زلمي خلیلزاد د افغانستان د سولې په باب د جرمني وروستۍ هلې ځلې ستایلې دي.
جرمني دوه اوونۍ دمخه اعلان وکړ چې چمتو دی، د افغانستان د سولې په تړاو د ښکېلو خواوو ترمنځ د بینالافغاني خبرو کوربهتوب وکړي.
وسلهوالو طالبانو د جرمني دا هڅه ستایلې، خو په اړهیې مشخص دریځ نهدی، ښوولی.
زلمي خلیلزاد په خپل ټویټرپاڼه باندې په وروستي ټویټ کې لیکلي چې د امریکا پالېسي دا ده چې د سولې په اړه به په بینالافغاني خبرو کې ښځو ته د مذاکره کوونکو په توګه ونډه ورکړل شي، خو هغه بلخ ته د خپل سفر په اړه څه نهدي ویلي.