د لاسرسي لېنکونه

تازه خبر
دوشنبه ۲۹ تله ۱۳۹۸ کابل ۰۸:۰۸

پاکستان له هندوستان سره د سولې د خبرو لپاره لېوالتيا ښودلې


د هندوستان او پاکستان بیرغونه

پاکستان له هندوستان سره د سولې د خبرو لپاره لېوالتيا ښودلې ده.

په همدې حال کې د هندوستان صدراعظم نریندرا مودي یو ځل بيا په نوي ډيلي کې واک ته رسېږي.

پاکستان په دې وروستیو کې اعلان وکړ چې له ځمکې ځمکې ته د شاهین دوه په نوم توغندي د ويشتلو اړونده روزنه یې پیل کړه.

د پاکستان په وينا، دا توغندي تر پنځلس سوه مایله پورې د اټمي او نورو وسلو د لېږد وړتيا لري.

د پاکستان پوځ په یوه اعلامیه کې وويل، شاهین دوه ډېره وړتیا لرونکی توغندی دی چې په سیمه کې د ثبات انډول ساتلو لپاره په بشپړه توګه د پاکستان ستراتيژيکې اړتیاوې پوره کوي.

د چهارشنبې په ورځ د پاکستان د بهرنیو چارو وزیر شاه محمود قریشي د قرغزستان په پلازمېنه بشکیک کې د شنګهای همکاریو کنفرانس په څنډه کې له خپل هندي سيال سره وکتل.

ده له دې غونډې وروسته وویل:

د پاکستان د بهرنیو چارو وزیر شاه محمود قریشي
د پاکستان د بهرنیو چارو وزیر شاه محمود قریشي

"موږ هېڅ کله په ترخه لهجه له یو بل سره نه یوو غږېدلي، موږ غواړو چې ښه ګاونډيان واوسو او د خبرو له لارې مهم مسايل حل کړو."

دا خبرې په داسې حال کې دي چې د پاکستان او هندوستان تر منځ وضعیت په فبرورۍ مياشت کې دومره ترینګلی شو چې دواړه هېوادونه د کشمير پر سر جګړې ته نېږدې شول.

هندوستان د پاکستان په بالاکوټ سيمه کې هوايي عمليات وکړل او په وینا يې، هلته یې د سخت دريځو کمپ هدف وګرځاوه.

په غبرګون کې یې پاکستان هم هوايي حملې وکړې او د کشمير پر سر د دواړو هېوادونو تر منځ نښتې وشوې.

پاکستان د یو څه مودې لپاره خپل هوايي قلمرو د ټرانسپورت پر مخ تړلی و چې په نتيجه کې يې هندوستان او د نړۍ نورو برخو ته پروازونه مختل شول.

د پاکستان صدراعظم عمران خان په دوامداره توګه ويلي چې له هندوستان سره له کشمير په اړه د مسایلو د حل لپاره خبرې کول غواړي.

د روېټرز خبري اژانس راپور وايي چې پاکستاني چارواکو هيله څرګنده کړې وه چې د هندوستان تر انتخاباتو وروسته ښايي دا خبرې وشي.

عمران خان تېره مياشت وویل چې دی په دې باور دی چې که د هند د صدراعظم نریندرا مودي بهارتیه جنتا ګوند انتخابات وګټي، د مذاکراتو احتمال زياتېږي.

XS
SM
MD
LG