د ننګرهار چارواکي وايي، په جلالاباد ښار کې د پرلهپسې څلورو چاودنو په نتيجه کې څلور ملکيان وژل شوي او شاوخوا شل نور ټپیان شوي دي.
د ننګرهار والي شاه محمود مياخېل د ټپیانو د لیدو پرمهال خبريالانو ته وويل چې ټول وژل شوي او ټپیان ملکيان دي.
دی وايي:
"د ريکشې په وسیله باندې انفجار د تلاشی په چوک وشو، د پېښې ټول قربانيان ملکي او عام وګړي دي."
د ننګرهار د والي وياند عطاالله خوګياڼي ازادي راډيو ته وويل چې چاودنې د دوشنبې په ماښام اووه بجې، د جلال اباد ښار په څلورمه ناحيه کې د پولیسو یوه هاموې موټر ته نېږدې وشوې.
خوګياڼي زياته کړه چې د چاودنې د څرنګوالي په اړه معلومات نشته خو داسي ښکاري چې د پېښې په ځای کې چاودېدونکي مواد ځای پر ځای شوي وو.
د دې پيښې مسؤلیت تر اوسه چا نهدی منلی.
په ننګرهار کې هم طالبان او هم داعش ډله فعاله ده.
ولسمشر محمد اشرف غني له طالبانو وغوښتل چې د روژې مبارکې مياشتې په لومړۍ ورځ د مې مياشتې په شپږمه نېټه اوربند وکړي، خو دې ډلې د ولسمشر د اوربند وړانديز نه دی منلی.