د لاسرسۍ وړ لېنکونه

تازه خبر
پنجشنبه ۹ وری ۱۴۰۳ کابل ۰۴:۰۷

د افغانستان او سکاټلنډ د کرکټ ملي لوبډلې نن د سیالۍ ډګر ته وځي


د افغانستان د کرکټ د ملي لوبډلې یو انځور
د افغانستان د کرکټ د ملي لوبډلې یو انځور

د افغانستان او سکاټلنډ د کرکټ ملي لوبډلې نن د یوې یو ورځنۍ لوبې یا ODI لپاره د سیالۍ ډګر ته وځي.

ټاکل شوې چې د سکاټلنډ په ادینبرا ښار کې دا لوبه د کابل په وخت د ماسپښین په دوه نیمو بجو پیل شي.

د افغانستان د کرکټ بورډ تخنیکي سلاکار تاج ملوک عالم د پنجشنبې په ورځ ازادي راډیو ته وویل چې دا لوبه د افغانستان لپاره ډېره مهمه ده.

ده وویل:

"دا لوبه د ټیم لپاره ځکه مهمه ده چې د نړیوال جام په درشل کې د لوبغاړو همغږي او کمبینېشن پرې جوړېدای شي او زموږ د لوبې لپاره د لوبغاړو پرکټس هم ډېر مهم دی."

افغانستان به د جون په لومړۍ نېټه د کرکټ په نړیوال جام کې خپله لومړۍ لوبه له استرالیا سره وکړي، خو د دې سیالیو له پیله مخکې پنځه تمریناتي مسابقې کوي چې یوه به یې له سکاټلنډ، دوه له ایرلنډ، یوه له پاکستان او یوه له انګلستان سره وي.

XS
SM
MD
LG