د کندهار اوسېدونکي وایي، د جګړې دوام د هېواد مهم بنسټونه کمزوري کوي او يوازې افغانان پهکې قرباني کېږي، نو لازمه ده چې د جګړې ښکېل لوري اوربند او سوله وکړي.
د روژې په مبارکه مياشت کې په هېواد کې د جګړو دوام د کندهار ښاريان اندېښمن کړي دي.
خلک وایي، په جګړه کې ټول د افغانانو وينه تویېږي او د جګړو دوام د هېواد مهم بنسټونه ځپي.
دوی د روژې په مياشت کې د جګړې له ښکېلو دواړو غاړو څخه د سمدستي اوربند او سولې غوښتنه کوي.
د کندهار ښار یوه اوسېدونکي عصمتالله ازادي راډیو ته وویل، وسلهوال دې نور د وينې تویېدنې پر ځای د سولې او روغې جوړې سیاست غوره کړي.
عصمتالله زیاتوي:
"روژه یوه مبارکه میاشت ده، له وسلهوالو طالبانو او امنیتي ځواکونو څخه مې هیله دا ده چې د دې مبارکې میاشتې په برکت دې اوربند وکړي."
د هېواد په یو شمېر سیمو کې وروستي تاوتريخوالي د عامو خلکو تر څنګ دیني عالمان هم خواشیني کړي او په هېواد کې د شخړې د سمدستي درېدو غوښتنه کوي.
د کندهار د دیني عالمانو د شورا رئیس مولوي عبیدالله فیضاني او مولوي رحیمالله چې د روژې په رارسېدلو سرهیې د جوماتونو له ممبرونو هم د جګړې په ښکېلو غاړو د اوربند غږ کړی ازادي راډیو سره په خبرو کې د جګړې د درېدو غوښتنه کوي او د بېګناه انسانانو وينه تویول حرام ګڼي.
د کندهار اوسېدونکي او دیني عالمان پر داسې مهال د وسلهوالو طالبانو او افغان امنیتي ځواکونو ترمنځ د اوربند غوښتنه کوي چې دا مهال د کندهار په شمالي او شمال ختیځو ولسوالیو کې تر بل هر وخت د ناامنیو پېښې زیاتې شوې دي.
راپور: صادق رښتینی