په غزې تراړه کې د فلسطینیانو او اسرائیل ترمنځ د تاوتریخوالي تازه څپه پورته شوې ده.
د اسرائیل جنګي الوتکو د شنبې په ورځ پر غزې تراړې بیا بریدونه وکړل.
تر اوسه پورې د اسرائیل پوځ پر غزې د تازه برید د مرګ ژوبلې په اړه څه نه دي ویلي خو د فسلطینیانو روغتیايي سرچینو ویلي دي چې په نننۍ بمبارۍ کې یو فلسطینی وژل شوی او درې نور ټپیان شوي دي.
د اسرائیل پوځ وايي، دا تازه هوايي برید يې د فلسطینیانو د حماس ډلې له خوا پر اسرائیلي سیمو د راکټي حملې په عکس العمل کې کړی دی.
د اسرائیل پوځي راډیو ویلي دي چې د شنبې په سهار له غزې تراړې شااوخوا پنځوس راکټونه د اسرائیل پر مختلفو سیمو لګېدلي چې کومه مرګ ژوبله يې نه ده پېښه کړې.
راپورنه وايي چې اسرائیلي الوتکو په دې تازه برید کې د حماس د راکټ توغولو دوه دستګاوې په نښه کړي دي.
تر دې وړاندې د جمعې په ورځ د اسرائیلي ځواکونو په یوه برید کې د حماس ډلې دوه وسله وال ووژل شول او یو بل فلسطینی بیا له اسرائیلي سرتېرو سره په اخ او ډب کې ووژل شو.
فلسطیني مقاماتو ویلي دي چې د غزې په هغو سیمو کې يې ښوونځي تخلیه کړي دي چې د اسرائیل د هوايي بریدونو له خطر سره مخامخ دي.
په غزې تراړه کې چې د حماس ډلې تر واک لاندې ده، د تېر کال له اپرېل میاشتې راهیسې هره جمعه زرګونه فلسطینیان د اسرائیل له خوا د غزې د کلابندۍ پر ضد مظاهرې کوي چې په زیاتو مواردو کې دا اعتراضونه په تاوتریخوالي بدلېږي.
فلسطیني روغتیايي سرچینو ویلي دي چې تر اوسه پورې په دې شخړو کې څه د پاسه دوه سوه فلسطینیان وژل شوي دي.
پر اسرائیلي سیمو د حماس ډلې په پرونیو ډزو کې دوه اسرائیلي سرتېري ژوبل شوي دي.
په همدې حال کې مصري چارواکي چې د اسرائیل او حماس ترمنځ يې د اوربند په لړزنده موافقه کې منځګړتوب کړی، هڅه کوي چې په سیمه کې د تاوتریخوالي د پراخېدو مخه ونیسي.
په غزه کې شااوخوا دوه ميلیونه فسلطینیان اوسېږي چې د اسرائیل د کلابندۍ له امله له سختو اقتصادي او روغتیايي ستونزو سره مخ دي.