د امریکا د متحدو ایالاتو ولسمشر ډونالد ټرمپ وویل چې د سپکو او متعارفو وسلو د تجارت د کنټرول له نړیوال تړونه وځي.
د امریکا مخکني ولسمشر بارک اوباما په ۲۰۱۳ میلادي کال کې دا تړون لاسلیک کړ.
خو د امریکا د کانګرس د سنا غړو لا نه دی تأیید کړی.
ډونالد ټرمپ پرون وویل:
"موږ له دې تړونه خپل لاسلیک بېرته اخلو."
هغه پرون، د اپرېل په شپږویشتمه په امریکا کې د وسلې د تجارت د ازادۍ د پلویانو د اتحادیې (National Rifle Association) په غونډه کې وویل چې حکومت به یې دا تړون تأیید نه کړي.
ډونالد ټرمپ وویل:
"زما تر ادارې لاندې به موږ هېڅ چا ته د امریکا ملي حاکمیت تسلیم نه کړو، نو زما اداره به هېڅ کله د ملګرو ملتونو د وسلو تړون تأیید نه کړی."
د نېشنل رایفل اسوسېشن غړي د دې پلوي کوي چې خلک د وسلو درلودو او د سپکو او متعارفو وسلو د تجارت ازادي ولري.
په دې اتحادیه کې د امریکا د وسلو د یو شمېر سترو شرکتونو مالکان، پېژندل شوي سیاستوال او لوي سوداګر غړیتوب لري.
هغوی په ۲۰۱۴ میلادي کال کې وویل چې د متعارفو او سپکو وسلو د تجارت د کنټرول نړیوال تړون د هغوی دې حق ته ګواښ پېښوي.
د وسلو د تجارت د کنټرول د نړیوال تړون هدف د متعارفو وسلو پر تجارت د قانوني کنټرول لګول دی.
دا تړون په نړۍ کې د سپکو وسلو، ټانکونو، جنګي الوتکو او جنګي بېړیو د اخیستلو او خرڅلاو شرایط تنظیموي او قانوني څارنه یې کوي.
د وسلو د تجارت د کنټرول تړون د نړۍ ۱۰۱ هېوادونو لاسلیک کړی دی.
خو د امریکا په شمول لږترلږه نهه ویشت هېوادونو لا نه دی تأیید کړی.
د امریکا ولسمشر ډونالد ټرمپ پرون د نېشنل رایفل اسوسېشن غړو ته وویل چې امریکا دا تړون رد کړی او نه یې مني.
د امریکا د متحدو ایالاتو ولسمشر ډونالد ټرمپ په ۲۰۱۷ میلادي کال کې رسماً په سپینه ماڼۍ کې کار پیل کړ.
ټرمپ له هغه راهیسې له یوشمېر مهمو نړیوالو موافقو وتلی دی.
هغه د اقلیمي تغییر په اړه د پاریس له نړیوالې موافقې چې هدف یې په نړۍ کې د مضرو ګازونو د تولید مخنیوی و، ووت.
ټرمپ امریکا د ۲۰۱۸ میلادي کال په مې میاشت کې له ایران سره د نړیوالو له اټمي موافقې وایستله.