پیکنګ د یوه لاره یو کمربند په نوم د نړیوالې غونډې کوربه دی.
دا نړیواله غونډه د پنجشنبې په ورځ پېل شوه او د شنبې په ورځ به پای ته ورسېږي.
یوه لاره یو کمربند د چین د حکومت ستره پروژه ده چې د ورېښمو د لرغونې لارې د احیا په نظر طرحه شوې ده.
د چین حکومت وايي چې د دې پروژې هدف سیمه ییز تجارت، تماس او همکارۍ ته وده ورکول دی.
د چین حکومت غواړي چې د یوه لاره یو کمربند پروژې په مرسته ځان د وچې او سمندر له لارې له اروپا او افریقا سره وصل کړي.
چین به د دې پروژې په مرسته د خپلو تجارتي مالونو لارې د افریقا او اروپا مارکېټونو ته په ارزانه بیه ورسوي.
په چین کې په دې اړه غونډې ته د پاکستان د صدراعظم او د روسې د ولسمشر په ګډون د نړۍ د اووه دېرشو هېوادونو استازي او لوړ رتبه چارواکي ورغلي دي.
د امریکا متحده ایالات او یو شمېر اروپايي هېوادونه د چین پر دې پروژه انتقاد لري.
هغوی چین ته خبرداری ورکړی چې دا پروژه یو شمېر هېوادونه چې د اقتصادي ودې په حال کې دي، د داسې لویو پورونو تر بار لاندې کوي چې هغوی یې د پرې کولو توان نه لري.
په پیکنګ کې غونډې ته د ایټالیا صدراعظم هم ورغلی دی.
ایټالیا د نړۍ د اوو سترو صنعتي هېوادونو د ډلې یوازنی هېواد دی چې د داسې لوړې څوکۍ چارواکي یې د پيکنګ په غونډه کې ګډون لري.
د روسیې ولسمشر پرون په ولادي واستوک کې د شمالي کوریا له مشر کېم جونګ اون سره تر کتنې وروسته پيکنګ ته ولاړ.
د امریکا متحدو ایالاتو دې غونډې ته استازی نه دی ور استولی.
د جرمني او فرانسې حکومتونو خپل وزیران ور استولي دي.
په پیکنګ کې د امریکا سفارت پرون د اپرېل په پنځه ویشتمه په یوه اعلامیه کې پر هېوادونو غږ وکړ چې د اقتصاد په نړۍ کې له منل شویو اصولو سره سمه اقتصادي ډيپلوماسي وچلوي.
داسې ډيپلوماسي چې د سفارت په وینا، د ټولو لپاره د منتاسب پرمختګ لاره خلاصه کړي او پیاوړي اقتصادي بنسټونه رامنځته کړي.
د چین حکومت په ۲۰۱۳ میلادي کال کې د یوه لاره یو کمربند پروژه پرانیستله.
چین به پر دې پروژې زر ميلیارده ډالر پانګه ولګوي.
د چین حکومت په وروستیو پنځو کلونو کې د دې ستر ابتکار پر مختلفو برخو نوي ميلیارده ډالر پانګه لګولې ده.
د چین بانکونو په دې موده کې بهرنیو دولتونو ته ۲۰۰ ميلیارده ډالر پور ورکړی دی.