سره له دې چې له ۲۰۰۱ میلادي کال راهیسې د ناټو زرګونه سرتېرو په افغانستان کې پوځي خدمت وکړ، خو بیا هم تېر میلادي کال پهدې هېواد کې تر ټولو خونړی کال بلل شوی او طالبانو هم خپل فعالیتونه لا پسې پراخ کړي دي.
د فرانس پرس اژانس په وینا په ۲۰۰۱ میلادي کال کې د طالبانو د واکمنۍ تر ړنګېدو وروسته اوس دا ډله تر بل تېر هر وخت زیاتې سیمې په واک کې لري.
د امریکا ولسمشر ډونالد ټرمپ د افغانستان له جګړې څخه چې تر اوسه پورې د ۲۳۰۰ امریکايي سرتېرو ژوند اخیستی دی او څه د پاسه یو تریلیون ډالر پرې لګېدلي، ناهیلې شوی دی.
ولسمشر ډونالد ټرمپ په تېر ډسمبر میاشت کې خپلو سلاکارانو ته وویل چې دی غواړي له افغانستانه نیمايي سرتېري وباسي هغه پرېکړه چې د فرانس پرس اژانس په وینا له ناټو سره له سلا مشورې پرته شوې ده.
خو د چهارشنبې په ورځ په کابل کې د ناټو تړون د ۷۰مې کالیزې په مناسبت جوړې شوې غونډې ته د افغانستان لپاره د دې تړون ملکي استازي نېکلاس کې د هغو لاسته راوړنو او پرمختګونو یادونه وکړه چې په افغانستان کې شوي دي.
نېکلاس کې وویل، افغانستان یوه مدرنه او خوځنده ډموکراسي ده او هغو لاسته راوړنو او پرمختګونو ته سلام کوي چې د ښځو د حقونو او په نورو برخو کې شوي دي.
نوموړي وویل، په افغانستان کې دا مهال میلیونونه ماشومان ښوونځیو ته ځي، د مطبوعاتو ازادي ده او د روغتیا برخه د لاسته راوړنو شاهده ده.
د ناټو ملکي استازي زیاته کړه چې دا تړون به تر هغې پورې په افغانستان کې پاتې او له افغانانو سره ودرېږي، څو پورې شرایط ښه شوي نهوي، خو د فرانسې خبري اژانس بیا د افغان امنیتي ځواکونو د مرګژوبلې زیاتوالي ته اشاره کړې او د ملګرو ملتونو د معلوماتو پر اساس وايي چې یوازې تېر میلادي کال د افغانستان جګړې ۳۸۰۴ ملکیان وژلي دي.
د ناټو تړون د جوړښت د ۷۰مې کالیزې په مناسبت د کابل په غونډه کې د ناټو د ملکي استازي سربېره د افغان حکومت اجرائیه رئیس عبدالله عبدالله او په افغانستان کې د نړیوالو ځواکونو عمومي قوماندان جنرال سکاټ مېلر هم ګډون کړی و.