د افغانستان ملي دفاع وزارت وایي چې د دولت ضد وسله والو خپلې حملې زیاتې کړي.
بدخشان، کندز، هلمند، کونړ، پکتیکا، بادغیس، فراه او فاریاب هغه ولایتونه دي چې اوسمهال په کې جګړه روانه ده.
د افغانستان د ملي دفاع وزارت ویاند قیس منګل د شنبې په ورځ ازادي راډيو ته وویل، امنیتي او دفاعي ځواکونه د وسله والو مخالفینو د حملو د په شا تنبولو تر څنګ د وسله والو مخالفینو پر وړاندې تهاجمي بریدونه هم ترسره کوي.
دی وایي:
"دوی ( طالبانو) په یو شمېر ولایتونو کې خپلې حملې شدیدې کړي چې په مقابل کې امنیتي ځواکونو هم دفاع کړې او هم تهاجمي حملې ترسره کوي."
د بدخشان ولایت ارغنج خواه ولسوالۍ او د غزني ښار د جمعې په ورځ د وسله والو مخالفینو د حملو شاهدان وو.
د بدخشان د ولایتي شورا مسؤلینو د شنبې د ورځې په سهار د وسله والو مخالفینو له لوري د دغه ولایت د ارغنج خواه ولسوالۍ د سقوط خبر ورکړ.
د بدخشان د ولایتي شورا غړی عبدالله ناجي وایي، پر دغې ولسوالۍ د وسله والې حملې په ترڅ کې ۱۲ امنیتي ځواکونه وژل شوي، ۷ ټپي او ۵ کسان اسیر نیول شوي دي.
دی زیاتوي:
"ارغنج خواه ولسوالۍ سقوط شوې، ۱۲ کسان وژل شوي او څو نور کسان ټپي لرو، همداراز ۵ کسان اسیر نیول شوي، هغه مرستندویه ځواکونه چې پرون ورسېدلي، هغوی هم څه ونشو کړای او بېرته راستانه شول، د هوا خرابی هم د دې لامل شو چې الوتکې سیمې ته ولاړې نشي او اوس ولسوالي په بشپړ ډول د امنیتي ځواکونو له کنټروله وتلې ده."
له دې سره د بدخشان اوسېدونکي وایي چې د دغې ولسوالۍ سقوط طالبانو ته پر فیض اباد د پراخو حملو زمینه برابروي.
ده وویل:
"حمید یم د فیض اباد اوسېدونکی، طالبانو پر ارغنج خواه ولسوالۍ حمله وکړه او دا ولسوالۍ له فیض اباد ښاره ۱۵ کیلو متره لېرې ده چې د فیض اباد لپاره یې جدي ګواښ پېښ کړی او که عملیات ونشي، طالبان به پر ښار پراخې حملې وکړي."
خو د ملي دفاع وزارت ویاند قیس منګل د بدخشان ولایت د ارغنج خواه ولسوالۍ سقوط ردوي او وایي چې په دغې ولسوالۍ کې لا هم تېزه جګړه روانه ده، د هغه په خبره، سیمې ته ځانګړي امنیتي ځواکونه هم رسېدلي دي.
له دې سره د غزني امنیه قوماندان جنرال داوود تره خېل وايي، چې طالبانو د جمعې په شپه د غزني ښار درېیمې حوزې اړوند پر څو امنیتي پوستو حملې کړي چې د درېیمې امنیتي حوزې د امر په ګډون، ۹ پولیس په کې وژل شوي او ۶ نور ټپي دي.
نوموړي زیاته کړه چې اوس په سیمه کې وضعیت د امنیتي ځواکونو تر کنټرول لاندې دی او سیمې ته تازه دمي ځواکونه رسېدلي دي.
د غزني ښار یو شمېر اوسېدونکي وایي چې په دغه ولایت کې امنیتي وضعیت کړکېچن دی او حکومت باید ورته پاملرنه وکړي.
نوموړي وویل:
"محمد جعفر یم د غزني اوسېدونکی، په دغه ولایت کې امنیت نشته، د حکومت رهبرانو ته مو چې رأیه ورکړې، ورنه د امنیت غوښتونکي یوو."
افغان حکومت هم د (خالد) په نوم پسرلني عملیات پیل کړي دي.
هر کال د پسرلي په رارسېدو سره د هېواد په بېلابېلو برخو کې جګړه پیلېږي، که څه هم له طالبانو سره د سولې خبرې هم روانې دي، خو وبه لیدل شي چې ایا دغه بهیر به تر یوه بریده د جګړې وضعیت بدل کړي او که نه؟
راپور: فېروزه عزیزي