افغان ولسمشر وايي چې له ترکمنستان سره توافق ته رسېدلي چې د نفتي مواد په مقابل کې به دغه هېواد ته مرمر صادروي.
افغان ولسمشر وايي، پهداسې حال کې چې نور فکر کوي چې د افغانستان وضعیت مبهم دی، افغان سوداګرو پانګونه د نړیوالو باور راجلبوي او د کار زمینه برابروي.
محمد اشرف غني د پنجشنبې په ورځ «۱۳۹۸ کال د وري ۰۸» د جلغوریو د پروسس او بستهبندۍ او د اوسپنو د ویلي کېدو د فابریکو په پرانېست غونډه کې وويل، افغانستان به د صنعتي موادو د وارېدونکي هېوادونو نه د صنعتي موادو په صادرونکي هېواد بدل کړي.
دی وايي:
"له ترکمنستان سره نتیجې ته رسېدلي یو چې د نفتي موادو په بدل کې به مرمر ورته صادر کړو، د لاجورد دهلیز پر اساس د اذربایجان له لارې د اروپا بازار درته خلاص دی."
ښاغلي غني وویل چې افغانستان د دوهم درجه اجناسو د وارداتو ځای نهدی او له دې وروسته به ضبط شي.
نوموړي همدا شان زیاته کړه چې افغاني محصولاتو ته ښه بازرا موندنه شوې ده چې له هغې جملې د متحده عربي اماراتو او اذربایجان بازارونه دي.
محمد اشرف غني وویل، نور نه غواړي چې د بامیان کچالو پاکستان ته صادر شي چې پرځای به یې اذربایجان ته ولېږل شي.
د افغانستان او هند تر منځ هوايي دهلېز پرانیستل شو
دا پهداسې حال کې ده چې افغانستان په تېر ۱۳۹۷ کال کې بهرنیو هېوادونو ته د ۶۰۰ میلیونو ډالرو په ارزښت صادرات درلودل.
د سیمې هېوادونو ته د هوايي دهلیزونو افتتاح، د چابهار بندر له لارې نور هېوادونو ته د افغاني مالونو صادرات، د چین، قزاقستان، هند او ازبکستان له لارې د افغان سوداګرو صادارت د افغانستان د صادارتو د زیاتوالی عمده لاملونه دي.
د افغان سوداګرو عمده صادارت، وچه او تازه مېوه، طبي بوټي، قالینې پوستکي او نور مالونه بلل کېږي.
بلخوا د نوي تأسیس شویو فابریکو مسؤلین ګاونډیو هېوادونو ته د داغمه لرونکو اوسپنو او جلغوزیو له قاچاق نه اندېښنه څرګندوي.
د میهن سټیل د فابریکې رئیس نقیب الله پهدغه غونډه کې وویل:
"ولسمشر له لوري د اوسپنې د قاچاق د مخنيوي، لپاره بې ساري اقدامات ترسره شوي، اوس هم د کندهار د سپینبولدک د پکتیا د انګور اډې له لارې زیات قاچاقېږي چې مخه یې باید ونیول شي."
ولسمشر ویلي چې د قاچاق مخه به ونیول شي.
نوموړي زیاته کړه چې په پکتیا، کاپیسا، لغمان، کونړ او ننګرهار کې پانګونه کوي چې ګاونډیو هېوادونو ته د قاچاق مخه ونیول شي.
راپور: رحمتالله افغان