د ملګرو ملتونو له نشهيي موادو او جرمونو سره د مبارزې اداره په نړۍ کې د نشهيي موادو له امله د مړينې د ډېروالي خبر ورکوي.
د ملګرو ملتونو له نشهيي موادو او جرمونو سره د مبارزې ادارې يا «UNODC» له نشهيي موادو سره د مبارزې کمېسیون د غړو هېوادونو استازو په ویانا کې «۶۲» مه غونډه وکړه.
د غونډې په پيل کې د ملګرو ملتونو له نشهيي موادو او جرمونو سره د مبارزې ادارې رئیس یوري فډوټوف وويل، د اعتياد پراخوالي ته په کتو سره د نړيوالې ټولنې مسؤليت نور هم زياتوي.
نړيواله ټولنه بايد د نشهيي موادو د تولید مخنیوی وکړي او پرېنهږدي چې نشه يي مواد بازارونو ته ورسېږي.
ښاغلي فډوټوف زیاته کړه:
"ګواښونه ورځ په ورځ په داسې حال کې ډېرېږي چې له نشهيي موادو سره زموږ مبارزه پڅه شوې ده. د هیروئینو، کوکائینو، شیشې او نشهیې ګولیو د تولید له ډېرېدو سره د خلکو د مړیني کچه هم لوړه شوې، خو د درملنې په برخه کې خدمات، روغتیايي مرستې او اجتماعي خدمات ډېر کم شوي دي."
پهدې غونډه کې د افغانستان د بهرنیو چارو، کورنیو چارو او ملي امنیت شورا د استازو یوه پلاوي هم ګډون درلود چې مشري یې د بهرنیو چارو وزارت معین ادریس زمان کوله.
د ملګرو ملتونو سازمان سرمنشي انتونیو ګوترش غونډې ته وویل، بازارونو ته د نشهيي موادو لېږلو او غوښتنې ډېروالي نه یوازې دا چې روغتیايي ستونزې را پیدا کړي، بلکې د ملګرو ملتونو سازمان انکشافي پروګرامونه یې هم ټکني کړي دي.
ګوترش زیاته کړه:
"له یو بله زده کړه او تجربو شریکولو له لارې کولای شو چې بازارونو ته د نشهيي موادو رسېدل او غوښتنه را کمه کړو. دغه ډول امنیت پراخ، بشري حقونه خوندي او د انسان روغتیا وساتو. راځئ چې په خپلو ګډو ژمنو عمل وکړو او د نشهيي موادو د مخنیوي په برخه کې له ګټورو لارو چارو څخه کار واخلو."
که څه هم د نړۍ ډېری کوکنار په افغانستان کې کرل کېږي چې نشهيي موادو دا مهال ۳،۵ افغانان په مستقیم او غیر مستقیم ډول زیانمن کړي دي.
د افغانستان د عامې روغتیا وزیر فیروزالدین فیروز له ازادي راډیو سره په خبرو کې د معتادینو د درملنې په برخه کې د نړیوالو مرستو د کموالي خبر ورکړ.
ښاغلی فیروز وايي، دوی هڅه کوي چې د معتادینو د درملنې لپاره کورني امکانات او مالي سرچينې پيدا کړي.
دی وايي:
"مالي سرچینې محدودي دي، بهرنۍ مرستې ورځ په ورځ کمېږي، دولت د دې توان نهلري چې په یوازې ځان مبارزه ورسره وکړي. موږ پر تنباکو مالیه دوه برابره لوړه کړه، هدف مو دا دی چې له دې لارې د معتادینو د درملنې لپاره مالي سرچینې پیدا کړو. موږ کولای شو چې له دې لارې په کال کې له دېرشو څخه نيولې بيا تر پنځوسو میلیونو ډالرو پورې د روغتیا سکټور ته ځانګړي کړو، پهدې ډول به وکولی شو چې د مرستو کمی جبران کړو."
د ملګرو ملتونو له نشهيي موادو سره د مبارزې رئیس د غونډې په پای کې له ګډونوالو هېوادونو څخه وغوښتل، په مالي او تخنیکي برخو کې دې له هغو هېوادونو سره مرستې وکړي چې د نشهيي موادو د تولید او استعمال له ستر ګواښ سره مخ دي.
په غږ کې یې هم اورېدلی شئ:
راپور: مرسلین ارسلا