د افغانستان د انتخاباتو خپلواک کمېسیون په ولسمشریزو انتخاباتو کې ځنډ اعلان کړ.
د افغانستان د انتخاباتو خپلواک کمېسیون ولسمشریز، د ولایتي شوراګانو او د غزني ولایت د ولسي جرګې انتخابات، له پخوانی اعلان شوې نېټې نه شاوخوا، دوه میاشتې وروسته ترسره کوي.
د دغې کمېسیون رئیسې حوا علم نورستانۍ د چهارشنبې په ورځ «۱۳۹۷ کال د کب ۲۹» په یوې خبري ناسته کې وویل:
"د انتخاباتو د قانون د احکامو د ښه پلي کېدو په تېره د ۱۹ مادې د حکم او همدارنګه د شفافیت، د نوم ثبتولو د عملي کېدو او په خوندي توګه د رأيې ورکوونکو د تشخیص په خاطر دې، د جمهوري ریاست، د ولایتي شوراګانو او د غزني ولایت د ولسي جرګې انتخابات، د ۹۸ لمریز د میزان په ۶ مه ترسره شي."
د انتخاباتو خپلواک کمېسیون هیله ښيې چې حکومت او نړیواله ټولنه دې، د ضرورت وړ بودجه په خپل وخت، کمېسیون ته برابره کړي.
د انتخاباتو د کمېسیون د ویاند مرستیال عبدالعزیز ابراهیمي وايي، د جمهوري ریاست، د ولایتي شوراګانو او د غزني ولایت د ولسي انتخابات، د انتخاباتو د تعدیل شوي قانون د مادو په پام کې نیولو او په تېرو انتخاباتو کې د تېروتنو د تکرار د مخنیوي په خاطر وروسته شوي دي.
د انتخاباتي کمېسیونونو پخوانیو غړيو د دغو انتخاباتو نیټه د ۹۸ لمریزکال د سرطان ۲۹مه اعلان کړې وه.
د انتخاباتو ځیني څارونکي بنسټونه وايي، باوري دي چې د جمهوري ریاست، د ولایتي شوراګانو او د غزني ولایت د ولسي جرګې انتخابات، د وخت، بودجې او نورو مواردو د کموالي له امله، د سرطان په ۲۹مه نه شي ترسره کیدلی.
د افغانستان د ازادو او عادلانه انتخاباتو اجرائیوي رئیس یوسف رشید د انتخاباتو د خپلواک کمېسیون تصمیم مجبوریت ګڼي او وايي، دغه کار د قانون خلاف دی.
ښاغلي رشید زیاته کړه:
"غوره تصمیم نهدی، د قانون خلاف دی، خو له مجبوریته کمېسیون بله لاره نه درلوده او اړ وو چې د انتخاباتو نېټه وروسته کړي، خو بیا هم دغه کار د اساسي قانون خلاف دی."
د انتخاباتو کمېسیون پهداسې حال کې د ولسمشریزو انتخاباتو نېټه وروسته کوي چې تر اوسه د ولسي جرګې د انتخاباتو بشپړ نتایج نهدي اعلان شوي.
راپور: خان محمد سیند