د ایران په سیستان بلوچستان ولایت کې پر ایراني ځواکونو د تېرې اوونۍ خونړي برید د دواړو ګاونډیو هېوادونو ایران او پاکستان اړیکې ترینګلې کړې دي.
د زیاتو شویو فشارونو او لفظي جګړې په ترڅ کې تهران هم د اسلاماباد د زاړه رقیب نوې ډېلي د دریځ په خپلولو سره په سیمه کې د ترهګرۍ په وړاندې په مبارزه کې د نږدې همکارۍ ژمنه کړې ده.
خو پاکستان چې په سیستان بلوچستان کې یې دغه حمله غندلې، له ایرانه د دغې حملې د عاملانو په اړه د شواهدو د شریک کولو غوښتنه کړې ده.
د ازداي راډیو د ګندهارا وېبپاڼې د راپور له مخې، په دغه برید کې چې د تېرې چهارشنبې په ورځ د سیستان بلوچستان ولایت د زاهدان او خاش ښارونو ترمنځ د ایران د سپاه پاسداران انقلاب د ځواکونو پر بس سرويس وشو، د دې ځواک لږ تر لږه ۲۷ غړي پهکې ووژل شول.
دغه برید په سړک کې د ځانوژونکي موټربم په واسطه شوی و چې مسؤلیتیې سني سخت دریځې جیشالعدل ډلې اخیستی دی.
په وروستیو کلونو کې دغې ډلې په سیمه کې د ډېرو نورو ورته حملو مسؤلیت هم اخیستی و.
د راپورونو له مخې، د دغې حملې په وړاندې د یو شمېر جګپوړو ایراني پوځي او سیاسي چارواکو له تندو عکسالعملونو وروسته ایران په سیستان بلوچستان کې د جیشالعدل په وړاندې ځپونکو اقداماتو ته مخه کړې.
د ایران سپاه پاسداران انقلاب ځواک ادعا کړې چې د دغې ډلې پټن ځایونهیې په سیمه کې لهمنځه وړي، درې مشکوک غړي یې نیولي او همیې اړوند یوه زیاته اندازه وسلې او مهمات ضبط کړي دي.
د ایران د پوځ لوی درستیز محمد باقري د دوشنبې په ورځ خبرداری ورکړی و چې که د ترهګرو ډلو پټنځایونه او د روزنې مرکزونه که هغه په هر دلیل وي، په پاکستان کې فعال وي، ایران د ملګرو ملتونو د منشور له مخې دا حق لري چې د اړتیا په صورت کې یې په اړه پرېکړې وکړي.
د سپاه پاسداران انقلاب ځواک د وژل شویو غړو د جنازې په مراسمو کې هم د دې ځواک مشر جنرال محمد علي جعفري ورته خبرداری ورکړی و چې که پاکستان د ترهګرۍ په وړاندې په مبارزه کې خپل مسؤلیت ترسره نهکړي، ایران به د ترهګرو ډلو په وړاندې چې د سیمې او له هغې وراخوا د سیمهییزو استخباراتي ادارو لهخوا تنظیم شوي، مبارزه وکړي.
جعفري وویل، د پاکستان حکومت په دې پوه دی چې د دغو عناصرو چې د اسلام لپاره خطر دي، ځای چېرې دی او باید د ترسره کړو جرمونو په خاطر ورسره حساب کتاب وشي.
د پاکستان د بهرنیو چارو وزیر شاه محمود قریشي د یکشنبې په ورځ خبریالانو ته وویل چې له خپل ایراني سیال د بهرنیو چارو وزیر محمد جواد ظریف سرهیې خبرې کړي او هغه تهیې ویلي چې پاکستان پر دغې پېښې چې هغهیې تراژیدي وبلله، ډېر خفه دی.
قریشي وویل، له تهرانهیې غوښتي چې د دغې حملې په اړه شواهد ورسره شریک کړي.
هغه هیله وښوده چې اسلاماباد او تهران به لکه د تېر په څېر په ګډې همکارۍ دغه ستونزه هواره کړي.
دوه ورځې مخکې تهران په پاکستان کې د ترهګرو ډلو د حضور په اړه پر اسلاماباد د نوې ډېلي لهخوا د فشارونو له یوځای کېدو سره د لېوالتیا نښې ښودلې وې.
په هندي کشمیر کې پر هندي سرتېرو د تېرې اوونۍ د خونړي برید مسؤلیت هم په پاکستان کې دېره جیش محمد سخت دریځې ډلې اخیستی دی.
د ایران د بهرنیو چارو مرستیال وزیر عباس عراقچي د هند د بهرنیو چارو له وزیرې سوشما سواراج سره په تهران کې د هغې د لنډ تم کېدو په مهال د خپلې کتنې په اړه په ټویټرپاڼه کې لیکلي چې دواړو لورو موافقه وکړه چې په سیمه کې باید د ترهګرو ډلو په وړاندې په جګړه کې له نږدې همکاري وشي.
جیشالعدل چې د ایران په سیستان بلوچستان ولایت کې چې اکثریت اوسېدونکي یې سني مذهبه دي، فعالیت کوي او وایي چې د خپلو حقونو د ترلاسه کولو لپاره مبارزه کوي.
په سیمه کې نورې مذهبي او په تبعید کې د بلوڅانو نورې ډلې ادعا کوي چې د ایران حاکم شیعه مذهبه رژیم له دوی سره د یوه قومي او مذهبي اقلیت په توګه له تبعیضه ډک چلند کوي.