د افغانستان د اطلاعاتو او فرهنګ وزارت په هېواد کې د جوړې شوې فرهنګي پالېسۍ پر طرحې مشورې پیل کړې دي.
د فرهنګي میراثونو ساتل، د بیان ازادي، اطلاعاتو ته لاسرسی، ژبه، فرهنګي تنوع، کتاب، کتابتون، فلم او داسې نور هغه فرهنګي موارد دي چې په نوې جوړې شوې فرهنګي طرحه کې ځای شوي او د سې شنبې په ورځ «۱۳۹۷ کال د سلواغې ۳۰» د اطلاعاتو او فرهنګ د وزارت لهخوا د فرهنګي چارو د متخصصینو مشورو ته وړاندې شوه.
د اطلاعاتو او فرهنګ وزارت ویاند صابر مومند ازادي راډیو ته وویل، د دغې فرهنګي پالېسۍ طرحه په وروستیو کلونو کې د وزارت د مسلکي ټیم لهخوا جوړه شوې او لازمه وګڼل شوه چې په هکلهيې د هېواد د پوهانو نظریات او وړاندیزونه راټول شي.
ده وویل:
"وزارت له څو لسیزو جګړو وروسته د لومړي ځل لپاره د ملي فرهنګي پالېسۍ مسوده ترتیب کړه او نن د بېلابېلو برخو د متخصصینو نظر غوښتنې ته وړاندې شوه، همدا اوس په اطلاعاتو او فرهنګ وزارت کې پرې کار روان دی او د دوی له نظرونو وروسته به د کابینې غونډې ته ځي او له تصویب وروسته به نافذېږي."
ښاغلي مومند وویل، پخوا تر دې د محمد ظاهر، محمد داوود او ورپسې په نورو حکومتونو کې د هېواد فرهنګي پالېسۍ جوړې شوې وې، خو په هېواد کې د روان ناوړه وضعیت له امله په سمه توګه پلې نهشوې.
د ښاغلي مومند په خبره، په نوې ملي فرهنګي پالېسۍ کې د هېواد د فرهنګ د بډاینې، پراختیا او پلي کولو لپاره ډېر ګټور موارد ځای شوي دي.
دا په داسې حال کې ده چې د افغانستان اکثره خلک، د ملي شورا غړي او د فرهنګي چارو پوهان له ۲۰۰۱ کال راوروسته په هېواد کې له فرهنګي فعالیتونو راضي نهدي او ډېری فرهنګي فعالیتونه له ملي ارزښتونو سره په ټکر کې ګڼي.
د فرهنګي چارو پوهان وايي، په وروستیو کلونو کې د هېواد فرهنګي برخو ته ډېر پام نهدی شوی او ټینګار کوي چې وروسته له دې باید له پامه ونهغورځول شي.
د کابل پوهنتون استاد عبدالرزاق دوست په دې اړه ازادي راډیو ته وویل:
"په خواشينۍ سره چې زموږ په هېواد کې فرهنګ ته توجه نهده شوې، هر وزارت په خپل چوکاټ کې فرهنګي کمېټه لري، خو دا چې د هېواد په کچه دې یو مرکز موجود وي، داسې څه نهشته، که دوی کار وکړي او دا مرکز د ټول افغانستان او ټولو وزارتونو لپاره وي، دا به ښه وي."
دا په داسې حال کې ده چې څه موده مخکې د افغانستان د ولسي جرګې د پوهنې، لوړو زدهکړو وزارتونو او فرهنګي چارو کمېسیون ویلي چې افغانستان د ترهګرو د بریدونو تر څنګ د یو شمېر ګاونډیو هېوادونو تر فرهنګي بریدونو لاندې دی او حکومت او په تېره فرهنګي ارګانونو ته په کار ده چې مخهیې ونیسي.
د اطلاعاتو او فرهنګ وزارت وايي، د هېواد د فرهنګ خوندیتوب تهیې تدابیر نیولي دي.
راپور: خان محمد سیند