د افغانستان بانک د اروپايي ټولنې دغه اقدام چې افغانستان ېې د پیسو د سپینولو په تړاو د نه مبارزې له امله د تورلېست په هېوادونو کې شمېرلی، بې اساسه ګڼي.
وروسته له هغو راپورونو چې د اروپايي ټولنې کمېسیون افغانستان د پیسو د سپینولو په برخه کې د نه مبارزې له امله په تورلېست کې شامل کړی، افغانستان بانک دغه اقدام بې بنسټه ګڼي.
د دغه بانک ویاند ایمل عاشور د شنبې په ورځ ازادي راډیو ته وویل، افغان حکومت او په تېره افغانستان بانک د پیسو د سپینولو په برخه کې ښه مبارزه او موثر کارونه کړي چې په دې وروستیو کې د پیسو د نړیوال صندق له خوا ستایل شوي هم دي.
ده وویل:
"کوم فهرست چې اروپايي ټولنې خپور کړی، د پیسو د سپینولو په برخه کې یې افغانستان هم په کې شامل کړی دی، افغانستان بانک په دغه لېست کې د هېواد شاملول په کلکه ردوي او د افغانستان په اړه دا ډول پرېکړه بې بنسټه او نا سمه ګڼي."
دی وايي، د مالي اقداماتو نړیوالې ډلې افغانستان د پیسو د سپینولو او دترورېزم د تمویل پرضد مبارزه کې ستایلی، له خاکستري لېسته یې په سپین لېست کې شامل کړ.
دی وايي، د مقرراتو جوړول، د فساد پر وړاندې کمېټو کې د قوانينو پلي کول، له بېلابېلو دولتي ادارو سره د هوکړو لیکونو لاسلیکول، د پرمختللو سېستمونو رامنځته کول او د قاچاق کوونکو پر ضد مبارزه هغه کارونه دي چې د پیسو د سپینولو پروړاندې شوي دي.
دا په داسې حال کې ده چې اروپايي ټولنې په دې وروستیو کې افغانستان د پیسو د سپینولو پرضد د کمزورې مبارزې په دلیل په تورلېست کې شامل کړی چې دغه کار د جنایتکارو او ترورېستي ډلو ملاتړاو یو ګواښ ګڼل کېدای شي.
افغانستان، عربستان، پانامه، نایجیریا، ایران، عراق او پاکستان په هغو ۲۳ هېوادونو کې شمېرل کېږي چې د اروپايي ټولنې له خوا په تورلېست کې شامل شوي دي.
ویل کېږي چې په دې اړه د اروپايي ټولنې د کمېسیون له خوا د روان میلادي کال د جنورۍ په دېرشمه یو رسمي مکتوب هم د افغانستان د بهرنیو چارو وزارت ته استول شوی دی.
په ورته وخت کې د افغانستان د سوداګرۍ او صنایعو خونه پر دغه مسئله اندېښنه ښيي او ټینګار کوي چې دغه اقدام د افغانستان پر سوداګرۍ او پانګونې ناوړه اثر پرې باسي.
د دغې خونې مرستیال خان جان الکوزي ازادي راډیو ته وویل:
"دا زموږ لپاره ډېره سخته ده، زموږ تجارت له ستونزو سره مخ کوي، که افغانستان په تورلېست کې راشي، سره له دې چې په جنګي حالت کې یوو، پانګه هم د وتلو په حال کې ده، دا سخته ستونزه ده."
ښاغلي الکوزي د پیسو د سپینولو په برخه کې د حکومت مبارزې ته خوشبین دی او وايي چې په دې اړه ستونزې څه ناڅه لېرې شوي، خو له حکومته غواړي چې د دغې ستونزې هواري ته هڅې وکړي او اروپايي ټولنې ته قناعت ورکړي، څو افغانستان له نورو ستونزو سره مخ نه شي.
راپور: خان محمد سیند