د افغانستان د پوهنې وزارت د افغان نجونو د ښوونې او روزنې د پالېسۍ پرانیسته وکړه.
د افغانستان د پوهنې وزارت ښوونې او روزنې ته د نجونو د لاسرسي په تړاو دغه نوې پالېسي په داسې حال کې جوړه کړې چې دا مهال ۳،۷ میلیونه ماشومان ښوونځي ته له تګه محروم دي چې ۷۵ سلنه یې نجونې دي.
د پوهنې وزارت سرپرست میرویس بلخي د چهارشنبې په ورځ په کابل کې په دې اړه یوې ناستې ته وویل، د دې پالېسۍ هدف دا دی څو افغان نجونې زدهکړې ته لاسرسی پیدا او د بې سوادۍ کچه راټيټه شي.
ده وویل:
"د دي پالېسۍ مهم اهداف دا دي چې څنګه نجونې ښوونې او روزنې ته لاسرسی پیدا کړي، کوم خنډونه موجود دي او د لهمنځه وړلو لپارهیې باید څه وشي، ترڅو نجونو ته اسانتیا برابره شي او ښوونځي ته لاړې شي."
دا په داسې حال کې ده چې تر دې وړاندې د ماشومانو لپاره د ملګرو ملتونو وجهي صندوق یا یونېسیف ویلی چې په افغانستان کې څه باندې دوه میلیونه نجونې له ښوونځیو په بشپړه توګه بېبرخې دي.
یونېسف وايي، د ښځینه ښوونکو نشتوالی او ناامني هغه دوه عمده عوامل دي چې د دغو ماشومو نجونو د درس مخهیې نیولې ده.
اخوا د پوهنې وزارت وايي چې جګړو او ټولنیزو دودونو د ډېرو نجونو د تعلیم مخه نیولې، خو دوی هڅه کوي چې د سیمهییزو ښوونځیو په پروګرام کې د ډېر شمېر نجونو لپاره د زدهکړو زمینه برابره کړي.
په ورته وخت کې حنا اصفي وردګ چې د ماشومانو لپاره د ملګرو ملتونو د وجهي صندوق یا يونېسف له لوري د ځوانانو د سفیرې په توګه نومول شوې وايي، زدهکړې ته د لاسرسي لپاره افغان نجونې له سختو کړاونو تېرېږي.
اغلې اصفي وايي، د پالېسۍ جوړول به تر یوه حده ګټوره وي، خو په وینا یې اړتیا ده چې په دې برخه کې لا نورې هڅې هم وشي.
دا وایي:
"انشاءالله له دې وروسته به هره نجلۍ ښوونځي ته لاړه شي او زدهکړې به وکړي په لاره اچول د دې پالېسۍ مهم او ګټور ګام دی، خو اړتیا ده چې نورې هڅې هم وشي."
د پوهنې وزارت وايي چې په ټول افغانستان کې څه باندې ۳۰ په سلو کې ښځینه ښوونکې درس ورکوي، خو هڅه روانه ده چې دا شمېر زیات شي او ورسره به په مستقیمه توګه له زدهکړو محرومو نجونو ته هم د زدهکړو ډېر چانس برابر شي.
راپور: ناجیه ساپۍ