د افغانستان د انتخاباتو خپلواک کمېسیون د دغه هېواد د شکایتونو له کمېسیونه غواړي چې ژر تر ژره دې د پاتې ولایتونو د ولسي جرګې د انتخاباتو د وروستیو پایلو د اعلان په تړاو خپله پرېکړه ورسره شریکه کړي.
د افغانستان د انتخاباتو خپلواک کمېسیون وایي، د شکایتونو کمېسیون باید ژر تر ژره د پاتې ۱۵ ولایتونو د ولسي جرګې د انتخاباتو د وروستیو پایلو د اعلان لپاره د خپلو څېړنو په تړاو خپله پرېکړه له دغه کمېسیون سره شریکه کړي.
د دغه کمېسیون مرستیال ویاند عبدالعزیز ابراهیمي د دوشنبې په ورځ «۱۳۹۷ کال د سلواغې ۱۵» له ازادي راډيو سره په خبرو کې وویل، د انتخاباتو خپلواک کمېسیون ټول اسناد او شواهد د شکایتونو کمېسیون ته سپارلي، خو لا هم د شکایتونو کمېسیون د پاتې ولایتونو د وروستیو پایلو په اړه له دوی سره د خپلو څېړنو په تړاو پرېکړه نهده شریکه کړې.
ده وویل:
"موږ هیلهمند یوو چې ژر تر ژره به د شکایتونو کمېسیون خپلې موندنې وروستۍ کړي او موږ تهیې راواستوي، تر څو موږ د هغو له مخې د پاتې ولایتونو وروستۍ پایلې اعلان کړو او څرنګه چې تاسو پوهېږئ، دغې پروسې وخت ونیوه او په هېڅ لامل دا خبرې پلمه کېدای نهشي."
د ښاغلي ابراهیمي په خبره، تر دې دمه د ۱۸ ولایتونو د ولسي جرګې د انتخاباتو وروستۍ پایلې اعلان شوي او د کابل په ګډون د ۱۵ نورو پایلې پاتې دي.
ښاغلی ابراهیمي وایي، د لومړنیو پایلو له اعلان وروستهیې د ولسي جرګې د انتخاباتو د پایلو نوملړ شکایتونو کمېسیون ته سپارلی و چې په ټاکل شوي وخت او په دې اړه اعتراضونه د قانون په چوکاټ کې وڅېړي او پایلې یې بېرته له دغه کمېسیون سره شریکې کړي.
د افغانستان د ولسي جرګې انتخابات د روان لمریز کال د میزان په ۲۸مه او ۲۹مه ترسره شول چې ګڼ انتقادونهیې له ځان سره لرل.
له دې وړاندې په مقطعهیي ډول د ولسي جرګې د انتخاباتو لومړنۍ پایلې د مدني ټولنې او پر انتخاباتو د څارونکو بنسټونو له تندو غبرګونونو سره مخ شوې وې.
اوس د پاتې ولایتونو د ولسي جرګې د انتخاباتو د وروستیو پایلو په اعلان کې ځنډ د انتخاباتو د خپلواک کمېسیون اندېښنې راپارولې دي.
له دې سره د شکایتونو کمېسیون کمېشنر عبدالبصیر فایز ازادي راډيو ته وویل، د پنځو نورو ولایتونو لوګر، غور، بادغیس، پکتیا او هرات څېړنې هم بشپړې شوي او د نورو ولایتونو پایلې به هم په راتلونکي کې بشپړې شي.
دی زیاتوي:
"موږ هڅه کوو چې د ټاکل شوي قانوني وخت په مطابقت خپل کارونه خلاص کړو او اوس د پنځو ولایتونو کارونه بشپړ شوي او موږ هغه د انتخاباتو د خپلواک کمېسیون په اختیار کې ورکړي، د شکایتونو حجم ته په کتو دغه پروسه وخت نیسي."
په ورته وخت کې د انتخاباتو خپلواک کمېسیون پخوانی مشر او د انتخاباتو د چارو پوه نجیبالله احمدزی وایي، د انتخاباتي کمېسیونونو ترمنځ نههمغږي د ولسي جرګې د انتخاباتو د وروستیو پایلو په اعلان کې د ځند لامل ګرځېدلې ده.
هغه ټینګار وکړ چې انتخاباتي کمېسیونونه باید د ولسي جرګې د انتخاباتو وروستیو پایلو د روڼوالي لپاره له یو بل سره په پوره همغږۍ کار وکړي، تر څو د دغو انتخاباتو د وروستیو پایلو اعلان هم خلکو او هم نوماندانو ته د منلو وړ وي.
راپور: فېروزه عزیزي