د لاسرسي لېنکونه

یکشنبه ۵ غبرګولی ۱۳۹۸ کابل ۰۳:۲۶

د امريکا استخباراتو د ټرمپ د بهرنۍ پالېسۍ په اړه ځينې ادعاوې ناسمې وبللې


ارشیف، د امریکا متحده ایالاتو ولسمشر ډونالد ټرمپ

د امريکا استخباراتي مشرانو پرون د ولسمشر ډونالد ټرمپ د بهرنۍ پالېسۍ په اړه ځينې ادعاوې ناسمې وبللې.

د امريکا متحده ايالاتو استخباراتي مشرانو چې د مشرانو جرګې استخباراتي کمېټې استماعيه غونډې ته خبرې کولې، د ولسمشر ډونالد ټرمپ پر ځينو ادعاوو شک څرګند کړ.

دوى د داعش ډلې په اړه د ولسمشر ټرمپ ارزونې او د شمالي کوريا مسئلې ته اشاره وکړه.

ښاغلي ټرمپ ويلي چې شمالي کوريا د خپلو اټمي وسلو محدودولو ته لېوالتيا ښوولې ده.

دغو مشرانو د ولسمشر ټرمپ هغه ادعا هم چلېنج کړله چې ويلي يې دي تهران هڅه کوي چې اټمي وسلې ترلاسه کړي.

دا هغه دليل دى چې ولسمشر ټرمپ د ايران او د نړۍ د پياوړو هېوادونو ترمنځ له اټمي تړونه تېر کال د واشنګټن د وتلو پر وخت وړاندې کړى و.

د امريکا دغو استخباراتي مشرانو د امريکا د جمهوري رياست په تېرو انتخاباتو کې د روسيې د ژورې لاسوهنې موضوع هم رابرسېره کړله او اټکل يې وکړ چې ښايي دا لاس‌وهنه په ٢٠٢٠ میلادي کال کې وشي.

ولسمشر ټرمپ په تېرو انتخاباتو کې د روسيې د لاس‌وهنې موضوع رد کړې ده.

دا استماعيه غونډه په‌داسې حال کې راوبلل شوه چې ولسمشر ټرمپ څو اوونۍ مخکې په سوريه کې د داعش ډلې په وړاندې د بريا او له دغه هېواده د امريکايي پوځيانو د سمدستي وتلو اعلان وکړ.

دا هغه اقدام و چې د امريکا دفاعي بنسټ او په منځني ختيځ کې يې د امريکا متحدان هک حيران کړل.

بل‌خوا په پام کې ده څو اوونۍ وروسته ولسمشر ټرمپ د شمالي کوريا له رهبر کېم جونګ اون سره په دوهمه سرمشريزه کې برخه واخلي.

د امريکا د ملي استخباراتو د ادارې مشر ډان کوټس
د امريکا د ملي استخباراتو د ادارې مشر ډان کوټس

خو د امريکا د ملي استخباراتو د ادارې مشر ډان کوټس پرون د مشرانو جرګې دفاعي کمېټې ته وويل:

"احتمال نه‌کېږي چې شمالي کوريا دې له اټمي وسلو او د هغو له توليد څخه په بشپړ ډول لاس واخلي، ځکه رهبران‌يې تل دا نظر وړاندې کوي چې اټمي وسلې د رژيم د خونديتوب لپاره مهمې دي."

د امريکا استخباراتي مشرانو خبردارى ورکړى چې د داعش ډلې په وړاندې بريا نه‌ده حاصله شوې او که امريکايي ځواکونه له سوريې ووځي، دغه افراطي ډله به له خلا څخه په استفاده بېرته سر اوچت کړي.

د دوى په باور داعش ډله، په عراق او سوريه کې په زرګونه جنګيالي رهبري کوي او لا يې ځينې سيمې په کنټرول کې دي.

XS
SM
MD
LG