د لاسرسي لېنکونه

چهارشنبه ۳۰ زمری ۱۳۹۸ کابل ۰۵:۵۹

معترضو کاندیدانو په کندز کې د ټاکنو د کمېسیونونو دروازې وتړلې


د کندز معترض کاندیدان

په کندز ولایت کې د ولسي جرګې معترضو کاندیدانو د تحصن خیمې په درولو سره په‌دغه ولایت کې د ټاکنو د کمېسیونونو دروازې وتړلې.

دغه معترض کاندیدان وايي چې باید بایو مټریک شوې رأيې له غیر بایو مټریک شویو څخه جلا شي او دغه‌راز د کندز د ټاکنو د کمېسیونونو د چارواکو د محاکمې غوښتنه هم کوي.

په کندز کې د ولسي جرګې دوو تنو معترضو کاندیدانو عبدالقدیر حسین‌خېل او عبدالغفور هوتک رسنیو ته وویل:

"موږ مجبور یو چې غیر مدني تحرکات پیل کړو او په کندز کې ولسمشریزې ټاکنې تحریم کړو، څو چې عدالت تأمین نه‎شي موږ ارام نه‌کېنو او خپل تحصن ته دوام ورکوو."

"موږ عدالت او شفافیت غواړو، د رأیو د بیا شمېرلو غوښتنه مو وکړه، خو پام ورته ونه‌شو، باید بایو مټریک شوې رأيې له غیر بایو مټریک شویو څخه جلا شي او دغه‌راز عدلي او قضايي بنسټونه دې هم دغه موضوع په جدي توګه تعقیب کړي."

د کندز معترض کاندیدان
د کندز معترض کاندیدان

دغه معترضان خبرداری ورکوي، که پر وخت د دوی غوښتنو ته د حل لاره پیدا نه‎شي، نو ولسمشریزې ټاکنې به تحریم او غیر مدني تحرکاتو به پیل کړي.

دوی په کندز کې د ولسي جرګې ټاکنې د اصلاح وړ نه‌بولي او پر ابطال‌یې ټینګار کوي.

په ورته وخت کې په کندز کې د مدني ټولنو د مشارکت شبکې رئیس عنایت‌الله خلیق هم له اړوندو ارګانونو غواړي چې باید عدالت تأمین کړي، ځکه خلک انتخابات غواړي، نه انتصابات.

نوموړی زیاتوي:

"باید رأيې له سره وشمېرل شي او غیر بایو مټریک شوې رأيې باید باطل اعلان شي او دغه‌راز هغو کسانو چې د خلکو له اعتماد او رأيو سره لوبه کړې، باید عدلي او قضايي ارګانونو ته معرفي شي."

ازادي راډیو هڅه وکړه چې په‎دې اړه په کندز کې د انتخاباتو د کمېسېونونو له چارواکو سره خبرې وکړي، خو ونه‌توانېده.

دغه معترض کاندیدان خبرداری ورکوي که په وخت سره د دوی قانوني غوښتونو ته رسېدنه ونه‎شي، ټولې دولتي ادارې او دغه‌راز د کندز-کابل، د کندز-شیر خان بندر او د کندز-تخار لويې لارې د ټرافیکو پر مخ تړي.

راپور: اجمل آرین

XS
SM
MD
LG