د افغانستان لويه څارنوالي وايي، د افغانستان د فوټبال فډراسيون پنځه غړي ممنوع الخروج اعلان شوي دي.
چارواکي وايي، په دغو کسانو کې د فوټبال فدراسيون مشر کرام الدين کريم هم شامل دى.
په وروستيو کې د فوټبال د نجونو د ټيم ځينو غړو د فوټبال فدراسيون څو مسؤلان په جنسي ځورونه تورن کړي دي.
د لويې څارنوالۍ وياند جمشېد رسولي نن جمعه ازادي راډيو ته وويل، د دوى يوې کمېټې په دې اړه څېړنې کړي دي:
دی وایي:
"د فوټبال فډراسيون د رئيس په شمول د دغه فدراسيون څلور مسؤلان ممنوع الخروج اعلان شوي، يو هم د فوټبال فدراسيون يو کارکوونکى د هيئت د نظر پر اساس ممنوع الخروج اعلان شوى دى، زموږ همکاران په جديت او قاطعيت دا قضيه څېړي."
د افغانستان د فوټبال د نجونو د ټيم د جنسي ځورونې په اړه اول بريتانوۍ ورځپاڼې ګارډين تېره مياشت راپور ورکړى و.
د افغانستان د فوټبال د نجونو د ټيم غړو نن يو وار بيا ګارډين ورځپاڼې سره د شوې جنسي ځورونې په اړه تازه جزئيات شريک کړي دي.
د فوټبال فډراسيون چارواکو پر ځانونو لګېدلي تورونه رد کړي دي.
د افغانستان لويه څارنوالي وايي د کورنيو چارو وزارت هم د شويو ادعاوو په اړه څېړنې پيل کړې دي.