د چین او پاکستان د بهرنیو چارو وزیرانو په افغانستان کې پر "نویو بدلونونو" خبرې کړې دي.
د چین لوړ رتبه ډيپلوماتانو نن د ډسمبر په ۲۵مه د افغانستان په وضعیت کې د نویو بدلونونو په اړه له پاکستاني لوري سره خبرې کړې دي.
چین او پاکستان په داسې وخت کې د افغانستان پر وضعیت خبرې کوي چې د امریکا متحده ایالات له افغانستانه د خپلو یو شمېر عسکرو د ایستلو پر امکان غږېږي.
د امریکا متحده ایالات په افغانستان کې تقریباً ۱۴۰۰۰ عسکر لري.
د راپورونو پر اساس، امریکا غواړي چې لږ تر لږه د عسکرو نیمه برخه له افغانستانه وباسي.
امریکايي چارواکو روېټرز خبري اژانس ته ویلي چې د متحده ایالاتو ولسمشر له افغانستانه د ۷۰۰۰ امریکايي عسکرو د ایستلو لفظي امر کړی دی.
خو سپینې ماڼۍ او د امریکا دفاع وزارت یا پنټاګون رسماً په دې اړه خبرې نهدي کړي.
چین او پاکستان نږدې متحدان دي.
چین په وروستیو کلونو کې له کابل سره د سیاسي او اقتصادي اړیکو د نږدې کولو لپاره هڅې زیاتې کړې دي.
د چین حکومت د افغانستان حکومت او وسله والو طالبانو ترمنځ د سولې د مذاکرو د پیل لپاره په هڅو کې هم مکرراً برخه اخیستې ده.
د چین د بهرنیو چارو وزارت ویلي چې د پاکستان د بهرنیو چارو وزیر شاه محمود قریشي نن په پيکېنګ کې د چین د بهرنیو چارو د وزیر وانګ یي سره په افغانستان کې پر وروستیو تغییراتو غږېدلی دی.
د چین د بهرنیو چارو وزارت وايي چې دواړه لوري په ډېرو مواردو کې موافقې ته رسېدلي دي.
د دې وزارت په بیان کې لیکل شوي:
"دواړو ډيپلوماتانو منلې چې د افغانستان مسایل له پوځي لارې حل نهلري."
چین او پاکستان ویلي چې سیاسي جوړجاړی د افغانستان د بحران د حل یوازنۍ منطقي لار ده.
خو په بیان کې له افغانستانه د یو شمېر امریکايي ځواکونو د وتلو پلان ته اشاره نهده شوې.
د چین د بهرنیو چارو وزارت ویاند نن په پیکېنګ کې په دې اړه پوښتنو ته د ځواب له ورکولو ډډه وکړه.
د چین د بهرنیو چارو وزیر د د ډسمبر په پيل کې کابل ته تللی و.
وانګ یي په کابل کې له چارواکو سره ژمنه کړې وه چې د کابل او اسلاماباد سره به د بېباورۍ او شک په لهمنځه وړلو کې مرسته وکړي.
چین له ډېرې مودې راهیسې په افغانستان کې له بېثباتۍ وېره لري.
د چین حکومت په خپل ختيځ ولایت شینجیان کې چې د اویغور مسلمانانو ټاټوبی او د افغانستان په اړخ کې پروت دی، د اسلامپالو وسلهوالو د فعالیت له زیاتېدو اندېښنه لري.