په افغانستان کې د امریکایي ځواکونو کمېدل به څه معنی ولري؟
هغه پوښتنه چې یو شمېر لوېدیځو څېړونکو یې په اړه بېلابېل نظرونه وړاندې کړي دي.
وروسته له هغه چې د امریکا متحده ایالاتو ولسمشر ډونالد ټرمپ له افغانستانه د خپلو ۷۰۰۰ سرتېرو د ایستلو پلان په ډاګه کړ، همدې مسئلې د دغه پلان د عملي کېدو پر عواقبو بحثونه راپارولي دي.
یو شمېر سیاسي څېړونکو له ازادې اروپا/ ازادي راډیو سره په مرکو کې خبرداری ورکړی چې له افغانستانه د شااوخوا نیمایي امریکایي ځواکونو وتل به د افغانستان امنیت لاخراب کړي، د حکومت او وسلهوالو طالبانو ترمنځ د سولې احتمالي خبرې به له خطر سره مخامخ کړي او د کابل او واشنګټن ترمنځ اړیکې به ترینګلې کړي.
د امریکا د پوځ یو وروستی راپور ښیي چې په دې وروستیو میاشتو کې د افغانستان پر خاوره د طالبانو کنټرول ډېر شوی او د راپور له مخې، افغان حکومت دا مهال د دغه هېواد یوازې پر ۵۵،۵ فیصده خاوره کنټرول لري.
د بحران نړیوالې ډلې یوه سلاکار او د افغانستان د چارو څېړونکی ګرایم سمېټ ویلي چې طالبان په پرلهپسې ډول د افغانستان د خاورې نیولو ته ادامه ورکوي او تمه کېږي چې دا کار دوام وکړي.
د سمېټ په خبره، له افغانستانه د امریکایي ځواکونو د وتلو عملي کېدل به د جګړو په ډګر کې د پام وړ بدلون رانهولي، ځکه د ده په خبره، واشنګټن به د دغه شمېر ځواکونو ځای امنیتي قراردادیانو ته ورکړي.
پنټاګون دا مهال په افغانستان کې له ۲۵ زره ډېر د خصوصي امنیتي کمپنیو قراردادیان لري.
افغان سیاسي څېړونکي هارون میر بیا ازادي راډیو ته ویلي چې د ۷۰۰۰ امریکایي سرتېرو وتل به د افغانستان امنیتي ستونزې ډېرې کړي.
ښاغلي میر پاکستان، ایران او ریاض ته په اشارې ویلي چې د امریکا دا اقدام به په افغانستان کې د سیمهییزو هېوادونو د رقابت ډګر تود کړي.
د افغان حکومت او طالبانو ترمنځ د سولې خبرو د پیلېدو په اړه د امریکا هڅې په دې وروستیو کې ډېرې شوي، څو د افغانستان بحران ختم شي.
په کابل کې د افغانستان د تحلیلګرانو شبکې په نوم یوه خپلواک تحقیقاتي مرکز یوه مشر توماس روتیګ ویلي چې د امریکا د ولسمشر دغه اقدام کولای شي چې د دغو هڅو په لړ کې د امریکا او هم د هغه د سیمهییز متحد افغان حکومت دریځ کمزوری کړي.
مایکل کوګلمن په واشنګټن کې د څېړونکو د یوه نړیوال مرکز متخصص دی.
هغه وایي، له افغانستانه د شااوخوا نیمایي امریکایي ځواکونو د وتلو په اړه د ولسمشر ټرمپ د اعلان وخت ناسم دی.
دی وایي، د سولې د هڅو په جریان کې دا ډول اعلان کولای شي چې د جګړې د ختمېدو لپاره د سولې د خبرو چانس لهمنځه یوسي.
بلخوا ځیني سیاسي شنونکي په دې باور هم دي چې له افغانستانه د امریکایي ځواکونو د یوې برخې وتل ښایي، ټولو خواوو ته یو ګټور پیغام وي.
سمېټ وایي، دا اعلان ښایي طالبانو ته دا پیغام ورکړي چې امریکا د سولې د خبرو په برخه کې جدي ده.
له افغانستانه د امریکایي ځواکونو وتل د وسلهوالو طالبانو له عمده غوښتنو ده چې تل یې ټینګار ورباندې کړی دی.
بلخوا د سمېټ په خبره، ښایي افغان حکومت اړ شي چې فکر وکړي چې سولې ته په کلونو نه، بلکې په لنډه موده کې رسېدلای شي.