د سپینې ماڼۍ ویانده وایي، امریکا له سوریې څخه د پوځي ځواکونو د وتلو لړۍ پیل کړې ده.
سارا هاکبي سندرز د ډسمبر پر ۱۹مه په یوې اعلامیه کې وویل چې په سوریه کې د وسلهوالو سیمهییز خلافت ماته خوړلې، خو زیاتوي چې د داعش پر وړاندې دا بریالیتوب په سوریه کې د نړیوال کمپاین د ختمېدو نښه نهده.
د سپینې ماڼۍ دا اعلان وروسته له هغه وشو چې له سوریې څخه د امریکایي ځواکونو د وتلو په اړه راپورونه خپاره شول.
«سي. اېن. اېن» ټلوېزیوني شبکې د امریکا د دفاع وزارت د یوه چارواکي له قوله چې نومیې نهو ښودلی راپور ورکړ چې وایي، امریکا متحده ایالات له سوریې څخه د خپلو ځواکونو د بشپړ او چټک وتلو پر پروګرام کار کوي.
د امریکا متحده ایالاتو ولسمشر ډونالد ټرمپ پر خپله ټویټرپاڼه لیکلي:
"د اسلامي دولت ډلې یا داعش وسلهوالو په سوریه کې ماته خوړلې او دا په هغه ځای کې زموږ د اوسېدو یوازنی دلیل وو."
د روان میلادي کال په پیل کې ولسمشر ټرمپ ژمنه کړې وه چې ډېر ژر به خپل پوځي ځواک له سوریې وباسي.
بلخوا روېټرز خبري اژانس د جمهوري غوښتونکي سناتور لېنډسي ګراهام «Lindsey Graham» له قوله لیکلي چې له سوریې څخهیې د امریکایي ځواکونو د وتلو په اړه د امریکا د ولسمشر پریکړه یوه تېروتنه بللې ده.
سناتور لېنډسي ګراهام چې تر ډېرهیې د ولسمشر ټرمپ دفاع کړې ده وایي:
"اوسمهال له سوریې څخه د امریکا وتل د داعش، بشارالاسد او روسیې لپاره یوه بریا ده."
سناتور ګراهام دا هم ویلي چې ویره لري له سوریې څخه د امریکایي ځواکونو وتل به امریکا، سیمې او ټولې نړۍ ته ناوړه پایلې ولري.
اوسمهال شااوخوا دوه زره امریکایي پوځيان په سوریه کې دېره دي چې ډېره برخهیې د ځانګړو ځواکونو پرسونل جوړوي.
دغه ځواکونه د کُرد ځواکونو له ائتلاف او عرب ملېشه سره یوځای په سوریه کې د داعش وسلهوالو پر وړاندې جنګېږي.
د امریکا ډېری پوځیان د سوریې په شمال ختیځو سیمو کې دېره دي او د عملیاتو پر مهال په هغو سیمو کې کُرد ځواکونو او عرب ملېشهوو سره مرسته کوي چې اوس هم هلته داعش وسلهوال فعالیت لري.