په یمن کې د سُني حکومت استازي چې سعودي عربستان یې ملاتړ کوي، نن، چهارشنبه، د شیعه حوثيانو له استازو سره چې ایران یې شاته ولاړ دی، د سولې د خبرو لپاره سویډن ته روان شول.
دواړه خواوې د ملګرو ملتونو د سازمان په غوښتنه په یمن کې د روانې جګړې د پای ته رسولو پر لارو د خبرو لپاره مخامخ سره کېني.
په یمن کې څلورکلنې کورنۍ جګړې، اقتصادي بحران او قحطۍ میلیونونه انسانان متأثر کړي دي.
د دې جګړې پای لا هم نه تر سترګو کېږي.
په یمن کې زرګونه کسان وژل شوي او بې کوره شوي دي.
د ملګرو ملتونو په وینا لږ تر لږه اته میلیونه یمنیان قحطۍ ځپلي دي.
د یمن د حکومت چې نړیواله ټولنه یې په رسمیت پېژني، استازي، عبدالله ال علیمي نن سویډن ته تر پرواز مخکې، پرټوېټر ولیکل: "د سولې ریښتینې موقع."
سعودي عربستان او متحده عربي امارات په یمن کې د حوثي ملېشه ځواکونو پرضد په جګړه کې د یو شمېر عربي هېوادونو د ګډ پوځي ائتلاف مشران دي.
دا ائتلاف په یمن کې د عبدربه هادي منصور له حکومت سره د حوثي ملېشه ځواکونو پرضد په جګړه کې مرسته کوي.
په یمن کې حوثي ملېشه قواوې په ۲۰۱۴ میلادي کال کې د ولسمشر هادي پرضد پورته شوې او د هغه هېواد پلازمېنه صنعا یې تر ولکې لاندې کړه.
حوثي ملېشه وتوانېدل چې د ولسمشر هادي حکومت ړنګ کړي او له یمنه تېښتې ته یې مجبور کړي.
ولسمشر هادي له هغه راهیسې جلا وطنه او په سعودي عربستان کې مېشت دd.
د سعودي عربستان په مشرۍ پوځي ائتلاف په ۲۰۱۵ میلادي کال کې د هادي په ملاتړ او د حوثي ملېشه ځواکونو پرضد پوځي عملیات پېل کړل.
د یمن جنګ تر ډېره حده د سعودي د سُني او د ایران د شیعه سیاستونو ترمنځ نیابتي جګړه ګڼل کېږي.
خو سعودي او اماراتو هڅې پېل کړې چې ځانونه له دې جنګه فارغ کړي.
د هغوی غربي متحدانو هم چې د جګړې لپاره د استخباراتي معلوماتو په راغونډولو کې مرسته ورسره کوي او وسلې ورکوي، په یمن کې د جګړې د پای ته رسولو لپاره فشارونه زیات کړي دي.
د یمن لپاره د ملګرو ملتونو ځانګړی استازی، مارتین ګریفیټس د دواړو ښکېلو خواوو ترمنځ د باور پېدا کولو هڅې کوي.
پهدې لړ کې د حوثي ملېشه ځواکونو زخمیانو ته اجازه ورکړل شوې چې د ولسمشر هادي د پلویانو تر ولکې لاندې سیمو کې روغتونونو ته د درملنې لپاره ولېږدول شي.
دا کار ځکه وشو چې د حوثیانو استازي په سویډن کې د منصور هادي له پلاوي سره خبروته حاضر شي.
د حوثیانو پلاوی د ډسمبر په ۴مه سویډن ته رسېدلی دی.
هغوی تر دې مخکې د یمن د وضعیت په اړه په جنیوا کې مذاکرو ته له حاضرېدو ډډه کړې وه.
د یمن لپاره د ملګرو ملتونو ځانګړی استازی غواړي چې دواړه لوري د صنعا د نړیوال هوايي ډګر پر پرانېستلو، د بندیانو پر تبادله او د یمن په بندري ښار حدیده کې چې د حوثي وسله والو په لاس کې دی، پر اوربند موافقه وشي.
خو د ملګرو ملتونو ډیپلوماتان وايي چې په دې اړه باید د چټک پرمختګ تمه ونه شي.
د امریکا سنا هم هڅه کوي چې پر داسې پرېکړه لیک موافقه وشي چې پر اساس یې په یمن کې د ائتلافي ځواکونو له جګړې د امریکا ملاتړ پای ته ورسېږي.
امریکا تېره میاشت په یمن کې د جګړې لپاره د ائتلافي قواوو الوتکو ته د تېلو له ورکولو ډډه وکړه.
د سعودي عربستان په مشرۍ په ائتلافي قواوو تور لګېدلی چې زرګونه ملکي یمنیان يې په بمباریو کې وژلي او زخمیان کړي دی.