ارګ وايي، د "سولې د مشورتي بورډ" د جوړولو کارونه تقریباً بشپړ شوي او راتلونکې اوونۍ به یې غړي اعلان کړي.
د افغانستان حکومت وايي چې دا له طالبانو سره د سولې د پروسې د شفافیت لپاره مهم دی.
په دې ډله کې به د افغانستان د ۳۴ ولایتونو د سیاسي ګوندونو، مدني ټولنې، د ښځو د ټولنو او ولسي شوراګانو استازي شامل وي.
د ولسمشر مرستیال ویاند شاه حسین مرتضوي نن جمعه د نومبر ۱۶مه ازادي راډیو ته وویل:
"دا بورډ به د حکومت له تخنیکي ډلو او د سولې له عالي شورا سره د سولې پر پروسه ګډ کار کوي، دا به همدا راز د حکومت له لوري له مذاکره کوونکي پلاوي سره کار کوي او د افغانستان د سولې په اړه هره پرېکړه به له دې بورډ سره د مشورې پر اساس کېږي. "
افغان ولسمشر محمد اشرف غني د نومبر په ۱۶مه په کابل کې له عبد رب رسول سیاف او د مشرانو جرګې له مشر فضل هادي مسلمیار هم په دې اړه د خبرو لپاره کتلي دي.
خو په افغانستان کې د سیاسي چارو یو کتونکی انتظار خادم وايي چې د سولې د مشورتي بورډ جوړېدل به د حکومت او طالبانو سوله ځنډنۍ کړي.
انتظار خادم وایي:
"موږ تشویش لرو چې د سولې بهیر او د افغانستان راتلونکې د یو شمېر خاصو کسانو د ګټو قرباني نه شي، د غني دا پرېکړه چې د ټولنې له ټولو اړخونو سره مشوره وکړي، ښه ده، خو دې بورډ ته د پرېکړې کولو حق ورکول د سولې پروسه لا پېچلې کولای شي."
د انتظار خادم په باور، په افغانستان کې د امنیت د خرابوالي له وجې حکومت ته لازمه ده چې له طالبانو سره د سولې د موافقې پر لور ګامونه چټک کړي او د سولې د مشورتي بورډ په څېر اضافي خبرې دا بهیر په غیر ضروري ډول اوږدولای شي.
خو په کابل کې د مدني ټولنې یو فعال سمیع دره اي وايي چې د سولې په مذاکرو کې باید ټول افغانان ونډه ولري او د سولې مشورتي بورډ یې منصفانه لار ده.
سمیع دره اي وویل:
"د مشورتي بورډ د جوړېدو بحث د افغانستان خلکو ته یو څه امید ورکړی دی، متاسفانه، که څه هم په افغانستان کې هڅه کېږي چې ټول کارونه د ارګ له ادرسه وشي، خو د مشورتي بورډ جوړېدل کولای شي چې د سولې په بهیر کې ټول خلک دخیل کړي."
د ملي یووالي پر حکومت له ډېرې مودې راهیسې له دې امله چې له طالبانو سره د سولې پروسه باید افغانستان شموله وي، فشار و.
پر حکومت په ځانګړي ډول په دې بهیر کې د ښځو د کمزوري حضور له امله په کور اونړیواله کچه انتقادونه کېدل.
د سولې د مشورتي بورډ غړي لا نه دي معرفي شوي.
دا په داسې حال کې ده چې د افغانستان د سولې لپاره د امریکا د بهرنیو چارو وزارت خاص استازی زلمی خلیلزاد په سيمه کې د سولې په خبرو بوخت دی.
خلیلزاد په اکټوبر کې هم افغانستان، پاکستان او سعودي عربستان ته ولاړ او په قطر کې یې د طالبانو د سیاسي دفتر له استازو سره خبرې وکړې.
د طالبانو د سیاسي دفتر استازو ویلي چې په لومړي ګام کې د امریکا له استازو او تر هغه وروسته له حکومت سره خبرې کوي.
افغان ولسمشر محمد اشرف غني ویلي چې له طالبانو سره سوله نېږدې ده.