د لاسرسي لېنکونه

چهارشنبه ۲۳ لړم ۱۳۹۷ کابل ۰۴:۱۴

د یمن د حوثیانو مشر: هېڅکله به د سعودي په مشرۍ ائتلاف ته تسلیم نه‌شم


د یمن د حوثیانو مشر وايي دی به هېڅکله د سعودي عربستان په مشرۍ ائتلاف ته تسلیم نه‌شي.

په داسې حال کې چې د سعودي عربستان په مشرۍ ائتلاف د یمن د حدیده ښار مرکز نیولو ته نېژدې شوي دي، د یمن د حوثي یاغیانو مشر عبدالمالک حوثي ویلي دي چې په هېڅ حال کې به د سعودي په مشرۍ ائتلاف ته تسلیم نه‌شي.

عبدالمالک حوثي د چهارشنبه په ورځ له یوه نامعلوم موقیعته ټلوېزیوني وینا وکړه او له خبرو يې ښکارېده چې ائتلافي ځواکونه د حدیده مرکز ته نېږدې شوي دي.

نوموړي وویل، که دښمن فکر کوي چې د دې او یا هغې سیمې په نیولو سره به موږ تسليمېدو ته اړ کړي، نو داسې به هېڅکله ونه‌شي.

د سره سمندر پر غاړه پروت د حدیده ښار په جګړه کې چې له یوې اوونۍ راهیسې روانه ده تر اوسه پورې د دواړو خواو نه دوه سوه کسان وژل شوي دي.

د سعودي په مشرۍ ائتلافي ځواکونو د جټ الوتکو او اپاچي هلیکوپټرونو له لارې په حدیده ښار پر کلابندو حوثي وسله والو بریدونه کوي.

په همدې حال کې سره صلیب او نور نړیوالو مرستندویه ادارو د یمن د جګړو پر دواړو خواو غږی کړی دی چې د حدیده ښار ملکیانو ته چې شمېر يې ۶ سوه زرو ته رسېږي له سیمې نه د وتلو لار ورکړي او پر ملکي وګړو او تأسیساتو له بریدونو ډډه وکړي.

د یمن جګړه ځپلو خلکو ته د نړیوالو مرستندویه ادارو اتیا په سلو کې مرستې د حدیده ښار له لارې رسېږي.

متحده ایالاتو چې د یمن په جګړه کې د سعودي په مشرۍ ائتلاف ته لوژستیکي اسانتیاوې برابروي، ټینګار کړی دی چې دا جنګ پوځي حل نه لري.

د امریکا د بهرنیو چارو وزارت دغه راز د ائتلافي ځواکونو له‌خوا د بشري مرستو د کارواونو او تأسیساتو په نښه کول د نه منلو وړ عمل بللی دی.

حوثي یاغیانو چې ایران پورې تړلي بلل کېږي، په ۲۰۱۴ میلادي کال کې د پایتخت صنعا په ګډون د یمن زیاته برخه ونیوله.

سعودي عربستان د یمن له حکومت سره لاس یو کړ او د حوثیانو پرضد يې هوايي او ځمکني عملیات پیل کړل چې په نتیجه کې يې حوثیان یوازې تر صنعا او حدیده پورې محدود پاتې شول.

د روغتیا د نړیوال سازمان د اټکل له مخې له ۲۰۱۵ میلادي کال راهیسې د یمن په جګړه کې تر اوسه پورې نېږدې لس زره کسان وژل شوي او میلیونونه نور بیړنیو بشري مرستو ته اړتیا لري.

XS
SM
MD
LG