د طالبانو ځواکمن قوماندان ملابرادر چې له اتو کلونو راهیسې د پاکستان په یوه زندان کې و، خوشې شوی دی.
ملا برادر نژدې دوه اوونۍ وروسته له هغه خوشې شوی چې د افغانستان د سولې لپاره د امریکا د بهرنیو چارو وزارت استازی زلمي خلیلزاد په قطر کې د طالبانو له استازو سره ولیدل او د افغانستان د جګړې د حل په اړه یې خبرې ورسره وکړې.
ویل کېږي چې د ملا برادر د خوشې کولو هدف ظاهراً دا دی چې نوموړی به د افغان حکومت او طالبانو ترمنځ د سولې له خبرو سره مرسته وکړي.
د طالبانو یوه جګپوړي چارواکي فرانس پرېس خبري اژانس ته ویلي چې د طالبانو استازو د اکتوبر په ۱۲مه له خلیلزاد سره په کتنه کې د ملابرادر او څو نورو طالب مشرانو د خوشې کېدو غوښتنه وکړه.
د طالبانو دا چارواکی وايي چې برادر به په غالب ګومان په پاکستان کې وي او په قطر کې د طالبانو د دفتر، کابل او اسلام آباد ترمنځ به تګ راتګ کوي.
د ازادي راډیو خبریال احمدتکل د سولې په هڅو کې د ملا برادر د رول په اړه د طالبانو د واکمنۍ د مهال له یوه چارواکي اکبراغا سره خبرې کړي دي.
اکبر اغا د مرکې په پیل کې وویل چې د پاکستان حکومت یوازې ملابرادر او د طالبانو د واکمنۍ د مهال یو بل مقام ملا عبدالصمد ثاني له بنده خوشې کړی دی.
دا مرکه د لاندې لېنک په کېکاږلو سره اورېدلی شئ:
