د انتخاباتو د خپلواک کمېسیون مشر ګلاجان بدیع صیاد وايي، پر ټاکنیز بهیر د خلکو صفر شوی اعتماد یې لوړ کړ.
صیاد پرون شنبه د اکټوبر ۲۰مه، په کابل کې په خبري غونډه کې ومنله چې د بایومټریک سیسټم د نوي والي او د وخت د کموالي له امله تخنیکې ستونزې پېښې شوي، خو ډېر خلک وتوانېدل چې رأی ورکړي.
صیاد زیاته کړه:
"زه له خپلو وطنوالو چې د رأیو مرکزونو ته راغلل مننه کوم چې مرکزونو ته راغلل او د خلکو د روغې دعوې یې باطلې کړې. دا د دې ښکارندوي ده چې خلک له انتخاباتو سره څومره مینوال دي او د انتخاباتو کمېسیون څومره کار کړی چې هغه اعتبار چې صفر درجې ته را ټيټ شوی و، داسې مرحلې را ورسوي چې میلیونونه وګړي له ټولو ستونزو سره هم له کورونو را ووځي او خپلو کاندیدانو ته رأی ورکړي."
د انتخاباتو خپلواک کمېسیون ویلي چې په هغو مرکزونو کې به چې د تخنیکې ستونزو له امله نه و پرانېستل شوي، نن یکشنبه د اکټوبر ۲۹مه بیا انتخابات وشي.
د ازادي راډیو خبریال نورالله شایان وايي د کابل ښار په باقرالعلوم جومات کې لا هم انتخاباتي ټاکنې نه دي پیل شوي.
په بغلان ولایت کې د ازادي راډیو خبریال بشیر احمد غزالي وايي ۲۲ انتخاباتي مرکزونه د امنیتي دلایلو له مخې تړل شوي وو، لا هم تړلي دي.
دی وايي ددې ولایت د انتخاباتو رئیس عبدالوهاب صافي ازادي راډیو ته ویلي چې نن یکشنبه به هېڅ انتخابات په بغلان ولایت کې ترسره نشي.
د ارزګان ولایت له ګیزاب ولسوالۍ پرته، نور د دغه ولایت په مرکز ترینکوټ او درېيو ولسواليو کې ټاکنې تېره شپه دولس بجې پای ته ورسېدي.
ولایتي اداره او د ټاکنو کمېسیون وايي چې ټاکنې په شفاف ډول په ښه توګه ترسره شوي او خلکو پکې پراخ ګډون وکړ.
په دې اړه نور تفصیل د ازادي راډيو د خبریال شریف الله شرافت په راپور کې د لاندې لېنک په کېکاږلو اورېدای شئ:
