د جوزجان ولایت اوسیدونکي د شبرغان ښار په بېلابېلو سیمو کې انتخاباتي مرکزونو ته تللي څو خپله رایه وکاروي.
د ازادي راډیو خبریال عالم رحمانیار ددې ښار انتخاباتي وضعیت څارلی او دا ویډیويي راپور یې پرې برابر کړی دی.
ویډیو ایدیت: تمیم اخګر
د کونړ والي عبدالستار میرزکوال وايي چې ټول ټاکنیز مرکزونه خلاص دي او په کومو سیمو کې چې وسله والو مخالفینو حمله کړې په شا تمبول شوي دي.
نوموړی زیاتوي چې په کونړ کې د دوی د توقع خلاف خلک رای ورکونې ته راوتلي او تردې مهاله کومه شدیده امنیتي پېښه نه ده شوې.
د کونړ له والي سره د ازادي راډیو خبریال محبوب شاه محبوب مرکه کړې چې د لاندې لېنک په کېکاږلو سره یې اورېدلی شئ:
د زابل د دوو ولسواليو اوسېدونکي په ټاکنو کې له ګډون څخه بې برخې دي. خاک افغان او دایچوپان هغه ولسوالۍ وې چې له لویه سره پهکې نومليکنه نه وه شوې.
بلخوا د دغه ولایت د مرکز کلات اوسېدونکي شکایت کوي چې تخنيکې ستونزې او د ټاکنیزو توکو کمښت اوږده انتظار ته اړ کړي.
په عین وخت کي د دغه ولایت والي که څه هم د ځينو تخنيکي ستونزو خبره مني خو وايي چې د رأی ورکونې بهیر ډېر ښه روان دي.
د زابل په مرکز کلات کې خلک او چارواکي یو ځای په کتارونو کې د رأیب کارونې په موخه نوبت ته انتظار دي.
دوی که څه هم د زابل په مرکز کې د رأی کارونې بهیر ګړندی ګڼي، خو د یو شمېر تخنيکې ستونزو یادونه کوي.
د رأی ورکونکو په خبره، په بایومټریک سيسټم کې تخنيکي ستونزې، په ځينو مرکزونو کې د ټاکنیزو توکو نه موجودیت او د رأی اچونې لپاره د ګمارل شوېو مامورینو ورو کار د دوی د اوږده انتظار سبب شوي.
په عین وخت کې د زابل والي رحمت الله یارمل هم د ځينو تخنيکې ستونزو خبره مني، خو وايي چې په ټوله کې دغه بهیر تر ډېره منظم دي.
د زابل ولایت له لسو ولسوالیو له ډلې په دوو ولسواليو «دایچوپان او خاک افغان» کې رأيه اچونه نه ده شوې.
د چارواکو په خبره یادو ولسواليو ته د ناامنیو له امله د نوملېکنې توکي نهدي رسېدلي او خلک یې په ټاکنو کې له ګډونه بې برخې دي.
زابل په ولسي جرګه کي درې څوکۍ لري چې شاوخوا ۲۶ کسانو ورته ځانونه کاندید کړي.
د ټاکنیزو چارو کارپوه پاینده حکمت وايي چې تېرو ټاکنو ته په کتو د اوسنیو ټاکنو ستونزې کمې او ښېګڼې زیاتې دي.
نوموړی وايي چې که څه هم د سیمې هېوادونو، وسله والو او یو شمېر نورو کړیو غوښتل چې دا ټاکنې ناکامې کړي، خو له نېکه مرغه دا ټاکنې تر ډېره د کامیابۍ په درشل کې دي.
له ښاغلي حکمت سره د ازادي راډیو خبریال محبوب شاه محبوب مرکه کړې چې د لاندې لېنک په کېکاږلو سره یې اورېدلی شئ: