د افغانستان د کورنیو چارو وزارت وایي، د افغانستان په بېلابېلو برخو کې یې د رای ورکولو په مرکزونو کې د ګډوډۍ او ناامنۍ دسیسي شنډې کړي دي.
د دغه وزارت ویاند نصرت رحیمي آزادي راډیو ته وویل:
"دقیقاً په کابل کې څو موارده دي چې دسیسې شنډې شوي دي، لکه چسپکي ماینونه، راکټونه یا موټر بم چې بېګا شپه امنیتي ځواکونو نیولي دي، په تخار، بدخشان او جوزجان ولایتونو کې هم ښه اکتشافات لرو په دې برخه کې."
په همدې حال کې راپورونه وایي، د کابل د نهمې امنیتي حوزې د درېیم مکروریانو په سیمه کې د چاودنې له امله د رايې اچونې بهیر له ځنډ سره مخ شوی دی.
یوې امنیتي سرچینې د نوم د نه ښودولو په شرط ازادي راډیو ته وویل چې چاودنه د عبدالهادي داوي په ښوونځي کې چې د رایه اچونې مرکز هم په کې وو رامنځته شوې ده چې له امله یو شمېر امنیتي سرتېري ټپیان شوي هم دي.
په سیمه کې د ازادي راډيو خبریال وايي چې د همدغه پېښې له امله د یاد مرکز ته څېرمه په بل مرکز الفتح ښوونځي کې هم د رایې اچونې بهیر ګډ وډ شوی دی او خلک یو ډول ویرې په مخه کړي دي.
له دې وړاندې د کابل د احمد شاه بابا په مېنه او قره باغ ولسوالۍ کې هم چاودنې شوي دي خو د امنیتي ځواکونو په وینا تلفات نه لري.
په کندز کې د انتخاباتو روان بهیر د سیمې خبریال اجمل څارلی او دا انځوریز راپور یې برابر کړی دی.
په کندز کې د انتخاباتو روان بهیر
د افغانستان په یو شمېر سیمو کې د رای ورکولو مرکزونه نه دي پرانیستل شوي.
د افغانستان د انتخاباتو خپلواک کمېسیون اعلان کړی وو چې دغه مرکزونه به د سهار له اوو بجو پرانیستي وي.
خو د آزادي راډیو او ځینو انتخاباتي څارونو د راپورونو له مخې په ځینو سیمو کې لا تر اوسه چې د غرمې دولس بجې دې مرکزونه نه دي پرانیستل شوي.
په ځینو سیمو کې چې مرکزونه پکې پرانیستل شوي د بې نظمیو راپورونه ورکړل شوي دي لکه د بایومتریک سیسټم کار نه کول، د رای پاڼو کموالی او په لستونو کې د رای ورکوونکو د نومونو نشتوالی.
خو د انتخاباتو د خپلواک کمېسیون مرستیال ذبیح الله سادات د یادو ستونزو په اړه آزادي راډیو ته وویل:
"موږ دا ستونزې منو، واقعاً موږ ورسره مخامخ شوي یو، بایومتریک یوه نوې پدیده ده اوموږ یې نوې تجربه کوو، هرڅه چې نوې وي حتماً ستونزې خو مهمه دا ده چې موږ ښه نتیجه ولرو."
په دغو انتخاباتو کې د ګډون لپاره نژدې ۹ میلیونه کسانو خپل نومونه لیکلي دي.
په خوست کې د ولسي جرګې لپاره په ټاکنو کې د خلکو ونډه ډېره ده.
نن د شنبې په ورځ د افغانستان د نورو ۳۲ ولایتونو په شان د خوست اوسېدونکي هم د ټاکنو د وخت له پیلېدو مخکې د رای اچونو مرکزونو ته ورغلل، تر څو خپلې رایې د خوښې وړ نوماندانو ته وکاروي.
که څه هم په مرکز او یو شمېر ولسوالیو کې د رای اچونې ډېری مرکزونه په خپل وخت پرانیستل شول، خو د بایو میټریک کولو ورو بهیر او د رای ورکوونکو په لیستونو کې په ځنډ د نومونو پیدا کول هغه ستونزې دي چې خلک اړ دي، تر څو د رایې استعمال ته یو څه وخت منتظر پاتې شي.
دوی غوښتنه کوي چې د رای اچونې وخت دې د مازدیګر لخوا دوه ساعته نور هم وغځول شي.
د خوست والي پوهندوی حکم خان حبیبي چې د خوست ښار په مرکزي جامع جومات د رای اچونې مرکز کې خپله رایه وکاروله، ازادي راډیو ته وویل چې په یاد ولایت کې په ټاکلي وخت د رای اچونې بهیر پیل شوی او خلک خپلې رايې کاروي.
دی زیاتوي، ولایتي ادارې د رای اچونې ټول محلونه پرانیستي خو دوی په ځینو سیمو کې امنیتي تهدیدونه نه ردوي.
د خوست والي په یاد ولایت کې امنیت نسبتاً ښه وباله او پر خلکو غږ وکړ چې په پراخه کچه را ووځي او په ټاکنو کې برخه واخلي.
د خوست په رای اچونو مرکزونو کې ځینې تخنیکي ستونزې موجودې دي چې رای اچونکي ورڅخه شکایت لري.
دوی وايي، د ټاکنو د کمېسیون کارکوونکي د بایومیټریک له ماشینونو سره ښه نه دي بلد او د یو کس په بایو میټریک ډېر وخت تېرېږي.
د تریزیو ولسوالۍ یو تن اوسیدونکي مختارالدین جلالزي د ټلیفون په لیکه وویل چې هلته زرګونو کسانو نوم لیکنه کړې، خو کمېسیون ورته یوازې د رای اچونې یو مرکز پرانیستی دی.
د مرکزونو ناوخته پرانیستل او د بایومیټریک د ماشینونو سم او چټک کار نه کول هغه ستونزې دي، چې د اسماعیل خېلو او مندوزیو، تڼیو، شمل او په خپله په مرکز کې یو شمېر رای ورکوونکو راسره شریکې کړې.
قومي مشر حاجي غنچه ګل وايي چې له یوې خوا د رای اچونې مرکزونه په ځنډ پرانیستل شول او بل لوري ته د تخنیکي ستونزو له کبله خلک نشي کولی، ژر-ژر رای استعمال کړي.
ده غوښتنه وکړه چې د رای اچونې وخت دې له ۴ بجو وروسته دوه ساعته نوره هم وغځېږي.
د مرکز اوسېدونکی شفیق الله وايي چې دا خلک د شته ستونزو سره-سره د دې لپاره راټول شوي چې داسو خلکو ته رای ورکړي چې هېواد او ولس ته ژمنتیا ولري.
دیني عالم مولوي محمدعارف عرفان هم له خلکو وغوښتل چې خپلې رای وکاروي، ځکه د دې هېواد د جوړولو یوازینۍ لاره رڼې ټاکنې دي.
ده زیاته کړه، خلک باید هغو نوماندانو ته رایه ورکړي چې ولس، خاورې او د هېواد نورو سپیڅلتیاوو ته ژمنتیا ولري.
د خوست امنیه قوماندان مل پاسوال اخترمحمد نورزوی وايي چې د ټاکنو د بهیر لپاره د یاد ولایت ټولو امنیتي او پوځي ادارو په ګډه امنیتي تدابیر نیولي او تر اوسه په مرکز او ولسوالیو کې داسې پيښه نه لري چې د رای اچونې د مرکزونو د تړل کېدو لامل شي.
د خوست امنیه قوماندان په یو شمېر سیمو کې امنیتي ګواښونه او ستونزې مني، خو وايي چې امنیتي ادارې د امکان تر بریده د پيښو سیمو ته ځانونه رسوي.