د افغانستان د انتخاباتو خپلواک کمېسیون دا حمله غندلې او پر امنیتي ځواکونو یې ږغ کړی چې خپله دنده مسئولانه ترسره کړي.
د دې کمېسون ویاند، سید حفیظ الله هاشمي ازادي راډیو ته وویل چې حمله هغو کسانو کړې چې په افغانستان کې د انتخاباتو په څېر د یوې ډېموکراتیکي پروسې بری نه غواړي.
سید حفیظ الله هاشمي وویل چې د کاندید ناصر مومند د وضعیت په اړه دقیق معلومات نه لري.
د هغه په وینا، په افغانستان کې د ولسي جرګې د کاندید انو د ابتدايي لست له خپرېدو راهیسي ۸ تنه کاندیدان وژل شوي دي.
په ننګرهار کې دننۍ حملې مسئولیت چا نه دی اخیستی.
په افغانستان کې د ولسي جرګې انتخابات د اکټوبر په ۲۰مه [دمیزان په ۲۸مه] کېږي.
د ننګرهار د کامې ولسوالۍ په سنګر سرای سیمه کې د ځان وژونکي برید له امله ۱۳ مړه او تر دوه څلوېښت نور زخميان شوي.
دغه برید د ولسي جرګې لپاره د نوماند عبدالناصر مومند د کمپاین په دفتر کې شوی.
د ننګرهار ولایت ویاند عطالله خوګياڼی وايي د پېښې پر مهال کومه لويه غونډه نه وه يوازې د سيمې شااوخوا خلک د کمپاین په خاطر دې دفتر ته راټول شوي وو چې د خلکو په منځ کې ځان وژونکی بردی شوی.
دی وايي، په دې پېښه کې دیارلس تنه مړه او ۴۲ تنه نور زخميان شوي دي:
"په دې وخت کې کومه غونډه نه وه خلک د کمپاین دفتر ته راټول شوي وو چې په دې پېښه کې دیارلس تنه مړه او دوه څلویښت نور زخميان شوي دي."
د پېښې عيني شاهدان هم وايي، د کمپاین په دې دفتر کې نه کوم دولتي کس و او نه هم خپله نوماند و.
دوی وايي په دې پېښه کې ټول عام او غریب خلک په کې قرباني شوي دي:
"عيني شاهد فياض خان: د دې پېښې نه مخکې هملته موږ ناست وو، خلک راټولېدل د کمپاین غونډه وه ټول ولسي خلک وو، دکانداران او ټول غریبکاره خلک وو نه حکومتي سړی په کې نشته او نه خپله نوماند په کې وو.
عيني شاهد غيرت: تر اوسه د مړو او زخميانو سم درک نشته چې څوک په کې مړه او څوک زخميان دي زموږ د کلي درې کسان دلته پراته دي او د ډېرو درک نشته دا یو کلیوال زموږ راغلی و لس کلن زوی ورسره و دا جسد يې دلته پروت دی"
د دې پېښې مسوولیت تر اوسه چا په غاړه نه دی اخیستی.
د ويلو ده چې د تېرې جمعې ورځې راهیسې په ټول هېواد کې د ولسي جرګې ټاکنو لپاره کمپاینونه پيل شوي چې د ټاکنیزو کمپاینونو په جریان کې دا لومړۍ خونړۍ پېښه وه چې رامنځته شوه.
راپور: شاه محمود شینواری
د ننګرهار د عامې روغتیا رئیس نجیب الله کاموال وایي چې د دغه ولایت د کامې ولسوالۍ په نننۍ پېښه کې ۱۳ تنه وژل شوي او تر ۴۰ نور ټپیان دي.
تر دې وړاندې نوموړي د وژل شویو شمېر ۱۳ او د ټپیانو شمېر ۵۵ تنه ښودلی و.
د ننګرهار ولایت په کامې ولسوالۍ کې د ځان وژونکي برید له امله ۱۳تنه مړه او تر ۳۰ زیات زخميان دي.
د ننګرهار ولایتي چارواکي وايي، په کامې ولسوالۍ کې د ولسي جرګې یوه نوماند په کمپايني غونډه کې ځان وژونکی برید شوی چې په پایله کې ۱۳ تنه مړه او له ۳۰ زیات زخميان شوي دي.
د ولایت ویاند عطالله خوګياڼی وايي، دا پېښه د سې شنبې په ورځ له غرمې وروسته د کامې ولسوالۍ په سنګر سرای سیمه کې ولسي جرګې ته نوماند د ناصر مومند د کمپاین په غونډه کې شوې.
نوموړی وايي، زخميان د جلال اباد مرکزي روغتون ته انتقال شوي دي.
د دې پېښې مسوولیت تر اوسه چا پر غاړه نه دی اخېستی.