د افغانستان کرکټ بورډ وايي، د کرکټ ملي ټيم نن په پوره چمتووالي د پاکستان په وړاندې د مسابقې ډګر ته وځي.
د افغانستان پر وخت نن د مازيګر څلور بجې په ابوظبۍ کې د افغانستان او پاکستان ملي لوبډلې په اسيايي جام کې سره مخامخېږي.
د کرکټ بورډ مطبوعاتي مسوول فريد هوتک نن ازادي راډيو ته وويل، په ټيم کې ډېر تغييرات نه دي راوستل شوي:
"لوبډله د دې سيالۍ لپاره پوره چمتووالى لري. د اسيايي جام د سياليو تر پيل مخکې د افغانستان د کرکټ ملي لوبډلې په متحده عربي اماراتو کې د دوو اوونيو لپاره تمريناتي کمپ ترسره کړى دى. لوبډله پوره چمتووالى لري او انشا الله د پاکستان په وړاندې به هم نن ښه وځلېږي."
افغان لوبډلې د اسیايي جام په لوبو کې تېره شپه د بنګله دېش لوبډلې ته په لوی توپیر سره ماتې ورکړه.
افغانستان په خپله لومړۍ مسابقه کې سريلانکا ته هم ماتې ورکړې وه.