په بلخ کې د ټاکنو د خپلواک کمېسیون د ساحوي دفتر مسؤلان د یاد کمېسیون د فعالیت د بندېدو او د ټاکنو د پروسې د ځنډېدو په اړه اندېښنه ښيي.
د بلخ ولایت د ټاکنو د خپلواک کمېسیون د دفتر مشر فضل احمد حیاتي وايي چې د تېرې اوونۍ د سې شنبې له ورځې راهیسې د لوی ملي ائتلاف پلویانو د ټاکنو د خپلواک کمېسیون دروازه بنده کړې او د یاد کمېسیون کارکوونکو ته د فعالیت اجازه نهورکوي.
ښاغلي حیاتي وویل چې د کمېسیون د بېرته فعالېدو په خاطر یې د بلخ سیمهییزې ادارې او امنیه قوماندانۍ څخه د مرستې غوښتنه کړې، خو تر اوسه پهدې برخه کې هېڅ عملي اقدامات نهدي شوي.
فضل احمد حیاتي زیاته کړه:
"په بلخ کې د ټاکنو خپلواک کمېسیون دروازه لا هم بنده ده، له یوې اوونۍ راپهدېخوا دا وضعیت دوام لري. موږ د محلي چارواکو او امنیتي ځواکونو سره ستونزه شریکه کړې، خو تر اوسه مشکل نهدی حل شوی."
د بلخ د امنیه قوماندانۍ ویاند شیر جان دُرانی وايي چې پولیس هڅه کوي، څو رامنځته شوې ستونزه په سولهییز ډول او د مذاکرې له لارې حل کړي.
دُراني ازادي راډیو ته وویل چې د ستونزې په حلېدو سره به کمېسیون ډېر ژر خپل فعالیت له سره پيل کړي.
نوموړی وايي:
"موږ د مذاکرې په حال کې یو او هڅه کوو څو دا ستونزه په مسالمتامېزه توګه حل شي او کمېسیون خپل فعالیت بېرته پيل کړي."
په همدې حال کې د بلخ ولایت اوسېدونکي هم وايي چې د ټاکنو خپلواک کمېسیون فعالیت باید ژر تر ژره بېرته پیل شي، څو د پارلماني او ولسمشریزو ټاکنو پر وخت ترسره کېدو کې ځنډ رانهشي.
دوی زیاتوي چې ځيني سیاسي څېرې او کړۍ پهدې هڅه کې دي، څو د یوې ملي پروسې پر وړاندې د خنډ په جوړولو سره خپل شخصي ګټې تأمین کړي او د انتخاباتو د ترسره کېدو مخه ډب کړي.
د مزار شریف دوه تنه اوسېدونکي پهدې نظر دي:
"سُدیس انصاري یم، څو سیاسي څېرې چې چندان مطرح هم نهدي هڅه کوي د انتخاباتو د ترسره کېدو مخه ونیسي، دوی د زور په وسیله غواړي دا ملي پروسه له ستونزې سره مخ کړي او خپلې ګټې تأمین کړي."
"خالق عباسي یم، ځیني سیاسي کسان او یو شمېر سیاسي دروغجن بهیرونه د خلکو له نامه په استفادې چې اصلاً د خلکو استازیتوب هم نهکوي، غواړي د ټاکنو ملي پروسه تخریب کړي. دوی په همدې دلیل څو اوباشان را ټول کړي او د ټاکنو د کمېسیون دروازهیې تړلې ده."
د مزار شریف اوسېدونکي له مرکزي حکومته غواړي چې د ټاکنو د خپلواک کمېسیون استقلالیت په پام کې نیولو سره هېڅ یوه زورواکي او وسلهوالو ته د ټاکنو په بهیر کې د مداخلې اجازه ورنهکړي.
دا پهداسې حال کې ده چې تېره اوونۍ د جمعیت ګوند اجرائیه مشر او د لوی ملي ائتلاف غړي عطا محمد نور اعلان وکړ چې ټاکنو کې د نهشفافیت په صورت کې به د ټاکنو د ترسره کېدو مخه ونیسي.
راپور: مجیبالرحمن حبیبزی