- نیویارک ټایمز
نیویارک ټایمز لیکي: دواړو مرګونو بریدونو وښوده چې داعش ډله د کابل په لویدیځ کې په ملکیانو خپلو بریدونو ته دوام ورکوي.
ورځپاڼه د دشت برچي په سیمه کې د میوند د پهلوانۍ په کلب کې د لومړني برید د یواځیني عیني شاهد په حواله لیکي چې په څو ثانیو کې د غیږنیونې میدان په یوه ویرجن ځای بدل شو او پهلوانان په خاورو او وینو کې لت پت پراته و.
نیویارک ټایمز همداراز لیکلي چې طالبان په ټول افغانستان کې تاوتریخوالی کوي خو ورځپاڼه لیکي چې له څو کلونو راهیسې په افغانستان کې داعش ډلې جنګ لاپسې پیچلی کړی دی.
- ګارډین ورځپاڼه
د بریټانیا ګارډین ورځپاڼې لیکلي چې په شیعه میشتو سیمو کې د داسې بریدونو تر شا تل د داعش ډلې لاس وي.
ورځپاڼې د پېښې د عیني شاهدانو په حواله لیکلي چې انتحاري بریدګر لومړی د میوند پهلوانۍ کلب ساتونکي په ډزو ووژل او وروسته یې په ځان پورې تړلي چاودیدونکي مواد وچول.
د ګارډین په لیکنه په ورته بریدونو کې خبریالان هم قربانۍ ورکوي.
د طلوع نیوز دوه خبریالان په وژل شویو کې شامل دي.
د کابل په پرونۍ بریدونو کې چې یو په بل پسې د میوند په پهلوانۍ کلب کې وشول ۲۶ کسان وژل شوي او څه باندې نوي تنه نور ټپیان دي.
وال سټریټ ژورنال
وال سټریټ ژورنال ورځپاڼې لیکلي چې په کابل کې د چهارشنبې د ماښام بریدونو د فرقه يي شخړو په اړه اندېښنې زیاتې کړي دي.
وال ستریت ژورنال: په دشت برچي کې بریدونه شیعه ګانو ته وښوده چې په سیمه کې یې هیڅ ځای امن نه دی
که څه هم افغان ولسمشر محمد اشرف غني د پنجشنبې په ورځ په کابل کې وویل چې د فرقه يي شخړو د رامنځته کولو لپاره د ترهګرو هڅې ناکامې دي خو ګارډین لیکي چې په دشت برچي کې بریدونه شیعه ګانو ته وښوده چې په سیمه کې یې هیڅ ځای امن نه دی.
د وال سټریټ ژورنال په لیکنه طالبانو او داعش ډلې په تېره یوه اوونۍ کې په افغانستان کې څه باندې درې سوه کسانو ته مرګژوبله اړولې ده.
- د ژورنالیستانو د خوندیتوب کمېټه
د ژورنالیستانو د خوندیتوب کمېټې هم په کابل کې د چهارشنبې د بریدونو په نتیجه کې د خبریالانو وژل کېدو ته په اشارې لیکلي چې افغان خبریالان له سخت ګواښ سره مخ دي.
د دې کمېټې د اسیايي پروګرامونو همغږي کوونکي سټیفن بوتلر په پرونیو بریدونو کې د طلوع نیوز د خبریال صمیم فرامرز او کمره مین رامز احمدي وژل کېدو ته په اشارې لیکلي چې افغان خبریالانو د ترهګریزو بریدونو د پوښښ په برخه کې له ځانه ډېره مېړانه ښودلې ده.
صمیم فرامرز او کمره مین یې له دوو نورو خبریالانو سره په دشت برچي کې د لومړني انتحاري برید د خبري پوښښ لپاره ورغلي و چې د دویم انتحاري برید ښکار شول.
د خبریالانو د خوندیتوب کمېټې د یوې څېړنې په اساس لیکلي چې افغانستان په ۲۰۱۸ کال کې خبریالانو ته تر ټولو زیات خطرناکه هېواد ثابت شوی ځکه د کال له پیله تر اوسه د رسنیو څه باندې لس کارکوونکي د کار په وخت وژل شوي دي.