د ننګرهار ولایتي چارواکي وايي، تېره شپه د خوګیاڼو ولسوالۍ په ځنګل کلي سیمه کې په افغانستان کې د داعش ډلې مشر سعد ارهابي وژل شوی دی.
د ولایت ویاند عطالله خوګياڼی وايي، د داعش ډلې دغه مشر د ملي امنیت ریاست د دقیقو معلوماتو د ورکړې وروسته په هوایي بریدونو کې د لسو نورو ملګرو سره یو ځای وژل شوی دی.
خوګياڼی وايي، په دې هوایي بریدونو کې د داعش ډلې دوه قرارګاوې او په زیاته اندازه مهمات هم له منځه تللي دي.
د ننګرهار د ولایتي ادارې د معلوماتو له مخې سعد ارهابي د اورکزۍ ایجنسۍ اصلي اوسیدونکی و چې د حسیب لوګري تر وژل کېدو وروسته د داعش ډلې مشري په غاړه لرله.
داعش وسله والو تر دې دمه رسنیو ته څه نه دي ویلي.