د افغانستان د کورنیو چارو وزارت وايي چې د اختر ورځو د لمانځلو لپاره ځانګړي امنیتي تدابیر نیول شوي او په ټول هېواد کې پولیسو ته د چمتووالي او تیارسی امر شوی دی.
د دغه وزارت ویاند نجیب دانش د دوشنبې په ورځ «۱۳۹۷ کال د زمري ۲۹» ازادي راډيو ته وویل چې امنیتي ارګانونو د لوی اختر په ورځو کې د امنیت د ټینګښت او د وسلهوالو مخالفینو د حملو د شنډولو لپاره ځانګړي امنیتي تدابیر پلان کړي دي.
ښاغلي دانش زیاته کړه:
"د لوی اختر د ورځو په مناسبت ټول امنیتي ځواکونه په لومړي احضاراتو کې دي او د نن سهار راهیسې زموږ احضارات پیل شوي دي، ټول امنیتي ځواکونه د امنیت په تأمین بوخت دي، حتی موږ امنیتي ځواکونو ته رخصتي نهده ورکړې، څو د اختر په ورځو کې په ښه شکل د خلکو امنیت وساتو."
د کورنیو چارو وزارت ویاند د افغانستان له ټولو خلکو وغوښتل چې د اختر په ورځو کې د ښه امنیت په هدف له افغان امنیتي ځواکونو سره مرسته وکړي.
کورنۍ دې ماشومانو ته د پلاستیکي وسلو او پټاقیو د اخیستلو اجازه نهورکوي.
د ښاغلي دانش په خبره د دې لپاره چې په مرکز کابل کې خلک دا ورځې په ښه شان تېرې کړي پهدغه ښار کې به امنیتي تدابیر لا جدي وي.
ده وویل، د افغانستان د کورنیو چارو وزارت سوداګرو او دکاندارانو ته هم ویلي دي چې پر ماشومانو د پلاستیکي وسلو او پټاقیو له خرڅولو مخنیوی وکړي.
ښاغلي دانش وویل، که هر پلورونکی د پلاستیکي وسلو په پلور ونیول شو له سختې قانوني سزا سره به مخ شي.
ده له کورنیو هم وغوښتل چې ماشومانو ته د پلاستیکي وسلو او پټاقیو د اخیستلو اجازه ورنهکړي او پرېنهږدې چې د خلکو د خوشحالۍ ورځې په غم بدلې کړي.
په ورته وخت کې خلک هم د خلکو د ښه امنیت پر ساتلو ټينګار کوي.
د کابل ښار دوو تنو اوسېدونکو ازادي راډيو ته وویل، تمه ده چې دا اختر په هېواد کې د تلپاتې سولې پیلامه وي.
دوی وايي:
"محمد ناصر یم، له خپلو امنیتي ځواکونو غواړم چې کلک امنیتي تدابیر ونیسي، څو خلک په خوښۍ سره دا لوی اختر تېر کړي."
"نوم مې محمد ابراهیمخېل دی، امنیتي ارګانونه هر کال وايي چې امنیتي تدابیر نیسو، خو بیا وروسته چې ګوري یوه نیمه پېښه خامخا کېږي، دوی چې یوه لاره نیسي بله ترې خلاصه پاتې کېږي یو کس تلاشي کوي، خو ۲۰ ترې بېتلاشۍ ځي، همدا لامل دی چې چاودنې کېږي او بېګناه انسانان وژل کېږي."
د افغانستان د کورنیو چارو وزارت پهداسې حال کې د اختر په شپو ورځو کې د امنیت د ټینګښت ډاډ ورکوي چې په تېر کوچني اختر کې چې د وسلهوالو طالبانو او حکومت ترمنځ لنډ مهاله اوربند هم شوی وو، په ننګرهار کې دوه انتحاري حملو لسګونه کسانو ته مرګ ژوبله واړوله.
د امنیتي چارو یو شمېر پوهان د دا شان پېښو لامل د پولیسو غیر مسلکیتوب او د امنیتي ارګانونو ترمنځ نههمغږي بولي.
د امنیتي چارو کارپوه حی ګل سلیمانخېل وايي، امنیتي ارګانونه باید د ښه پلان تر څنګ د پلان د عملي کولو او د امنیتي ارګانونو ترمنځ د ښې همغږۍ د رامنځته کولو لپاره جدي هلې ځلې وکړي.
راپور: اکرامالله اکرام