د افغانستان د سولې عالي شورا او د علماوو شورا له افغان حکومت او طالبانو وغوښتل چې د اختر په شپو ورځو کې اوربند وکړي.
د لوی اختر له رارسېدو سره د افغانستان د سولې عالي شورا او د علماوو شورا په یوه غږ له افغان حکومت او طالبانو غواړي چې د اوربند په اړه د خلکو غوښتنو ته لبیک ووايي.
کریم خلیلي او مولوي قیام الدین کشاف وايي، د دې اړتیا ده چې افغانان لوی اختر په امنیت او ارام فکر کې تېر کړي.
ښاغلي خلیلي د شنبې په ورځ له دواړو لورو وغوښتل چې لکه د کوچني اختر په څېر په لوی اختر کې هم اوربند وکړي.
نوموړي وویل:
"د طالبانو د ټول تحریک په ځانګړي ډول د دغې ډلې له رهبرۍ غوښتنه کوو چې اوربند اعلان کړي او د افغان حکومت او د طالبانو د تحریک له خوا دوه اړخیزه اوربند اعلان او رعایت شي، مونږ هیله مند یوو چې دا ګام واخیستل شي."
دا غوښتنه داسې وخت مطرح کېږي چې څه موده وړاندې د کعبې د امام په شمول، د اسلامي نړۍ لسګونو علماوو په افغانستان کې جګړه فتنه وبلله او د پای ته رسېدو غوښتنه يې وکړه.
له هغې وړاندې نېږدې دری زرو افغان علماوو همپه کابل کې د یوې غونډې له لارې په افغانستان کې د جګړې پر وړاندې فتوا ورکړه او روان جنګ يې حرام وباله.
له هغې څو میاشتې مخکې بیا د اندونیزیا، افغانستان او پاکستان علماوو د اندونیزیا په یوه غونډه کې په افغانستان کې د جنګ د ختمولو او د سولې خبرو د پیلولو غوښتنه وکړه.
د ملګرو ملتونو سرمنشي انتونیو ګوترش هم په تازه څرګندونو کې ویلي چې د افغانستان جګړه نظامي حللاره نه لري او ده هم په هېواد کې د اوربند د ژر ټینګېدو غوښتنه کړې ده.
د افغانستان د علماوو شورا رئیس مولوي قیام الدین کشاف مخکنیو غونډو او د علماوو دریځ ته په کتو وايي چې دوامداره اوربند باید اعلان شي چې د سولې د خبرو زمینه برابره شي.
دی زیاتوي:
"د علماوو او د دغه ځورېدلي ملت په غوښتنه مونږ اوږدمهاله اوربند غواړو چې د سولې خبرو اترو زمینه برابره کړي، خدای دې وکړي چې افغان ولس د اختر شپې ورځې او له هغې وروسته نورې میاشتې په سوله کې تېرې کړي."
طالبانو تر اوسه په دې اړه څه نه دي ویلي، خو د ولسشمر غني د ویاند مرستیال شاه حسین مرتضوي وايي، د اوربند د اعلان په اړه مشورې روانې دي او ولسمشر غني به ډېر ژر په دې هکله وروستی دریځ اعلان کړي.
په کوچني اختر کې د حکومت د اوربند له اعلان وروسته طالبانو هم د درېیو ورځو د اوربند اعلان وکړ چې دا بې ساری ګام د خلکو د تود هرکلي سره مخ شو.
اوس انتظار دا دی چې په لوی اختر کې هم اوربند وشي او د بیا غځېدو سره یې په دغه هېواد کې د سولې د خبرو زمینه برابره شي.
راپور: یوسف خان ځدراڼ