د کندهار د کرنې ریاست مسؤلین وايي چې په تېرو څلورو کلونو کې د شاتو ۵۲ فارمونه جوړ شوي چې پهکې هرکال زرګونه کېلو ګرامه شات توليدېږي.
د کندهار د کرنې او مالدارۍ رياست مسؤلين وایي چې د شاتو د مچيو صنعت د تېر خلاف اوس په کندهار کې وده کړې او هرکال زرګونه کېلوګرامه شات له همدې فارمونو څخه تر لاسه کېږي.
مسؤلين یې وایي، دا مهال د کندهار په بېلابېلو برخو کې په ۵۲ فارمونو کې د ۱۵۰ کسانو لهخوا د شاتو زرګونه مچۍ روزل کېږي.
د کندهار د کرنې ریاست د ترویج مدیر محمدالله نوري وايي چې سږکال تر دې مهاله له دغو فارمونو څخه ۱۸۰۰۰ زره کیلو ګرامه شات تر لاسه شوي او تمه ده چې د کال تر پایه دغه رقم ۶۰۰۰۰ زره کيلو ګرامه ته ورسېږي.
نوموړی وايي:
"په ۵۲ فارمونو کې موږ ۱۵۰کسانو ته د کار زمینه برابره کړې، شات مو منظم بسته بندي کړي، منظم مو صاف کړي دي او د دې مو اعلانونه راډیو ګانو ته ورکړي چې دا وطني شات دي."
نوري زیاته کړه چې د کندهاري شاتو معياري بسته بندي د دې لامل شوې چې په نړيوالو بازارونو کې هم خاص ځای او شهرت پېدا کړي.
نوموړی وایي چې دا مهال دوی د کندهار په بازارونو کې له بهره د واردېدونکو شاتو ۸۰ فیصده مخه نیولې.
پر همدې مهال په کندهار د شاتو خرڅونکي وايي چې د کندهار شات په کور دننه او بهر کې ښه بازار لري او د هېواد د نورو ولایتونو تر څنګ بهرنیو هېوادونو ته هم صادرېږي.
دوی زیاتوي چې له بهره د واردېدونکو شاتو په پرتله کندهاري شات باکیفیته او ارزانه دي.
د کندهار د کرنې رياست د مسؤلینو په خبره چې د مچيو د روزلو د صنعت د پیاوړتیا لپاره یې د خپل وزارت څخه د شاتو د مچیو د روزنې د پراختیايي پروګرام له لارې نوې بودجه تر لاسه کړې چې په مټ بهیې د دغه صنعت په اړه وړتيا لا زیاته او د نوو فارمونو جوړېدو ته به زمينه برابره شي.
راپور : صادق رښتینی