د امريکا کانګرس د جمهوريت غوښتونکي ګوند ځيني غړي مسکو ته تللي.
دوى وايي، هغه مأموريت پر مخ وړي چې هدفيې د مسکو او واشنګټن ترمنځ د اړيکو ښه کول او دا ارزول دي چې څلور کاله مخکې د لوېديځ تر لګول شویو بنديزونو وروسته، د روسيې اقتصاد څنګه دی؟
د کانګرس دغو غړو پرون دوشنبه مسکو ته تر رسېدو مخکې په سن پټرزبورګ کې د دغه ښار له والي ګيورګي پولتاف-چينکو «Georgy Poltavchenko» سره وکتل او د اړيکو د ښه کېدو هيلهيې څرګنده کړه.
پولتاف-چينکو دغه هيئت ته وويل، د راتلونکي په اړه خوشبين او په ټولو برخو کې همکارۍ ته چمتو دى.
د کانګرس دغه غړي د مسکو لپاره د امريکا د سفير جان هانټسمن جونیور په بلنه روسيې ته سفر کوي.
ويل کېږي په دوى کې د ولسمشر ټرمپ ملاتړي او متحدان هم شته.
ټاکل شوې د امريکا ولسمشر ډونالد ټرمپ د جولاى پر ١٦مه د روسيې او امريکا د اړيکو د ښه کولو د هڅو په لړ کې له خپل روسي سيال ولادیمير پوتين سره وګوري.
د دواړو هېوادونو ترمنځ دغه اړيکې له څو کلونو راهیسې سړې شوې دي.
د دغه هيئت يوه غړي، سناتور جان کېنډي «CNN» ټلوېزيون ته ويلي، دوى هيلهمند دي چې له ولسمشر ولاديمير پوتين سره هم وګوري.
د امريکا کانګرس شااوخوا یو کال مخکې په اوکراین کې د لاسوهنې په خاطر پر روسیې نوي بنديزونه لګولي وو.
سناتور کېنډي وايي، دی غواړي وګوري له هغه وروسته د روسیې اقتصاد په څه حالت کې دی؟
امریکايي چارواکو ويلي وو چې روسیې د امريکا په تېرو ولسمشريزو انتخاباتو کې د لاسوهنې هڅې کړې وې.
ايا دا موضوع به هم د خبرو برخه وي؟
سناتور کېنډي ويلي چې دی نهغواړي نړيوالې ناندرۍ جوړې کړي، خو پهدې اړه بايد ښکاره او شفافې خبرې وشي.
ده «سي. اېن. اېن» ټلوېزيون ته ويلي چې پر روسیې نهيوازې د امریکا په انتخاباتو کې د لاسوهنې تور دی، بلکې د فرانسې او جرمني په انتخاباتو او له اروپايي اتحاديې څخه د بریتانيا د وتلو په رأی کې هم ورباندې د لاسوهنې تورونه دي.
د کانګرس دغه پلاوی به تر راتلونکې پنجشنبې پورې په روسيه کې پاتې وي.