د فوټبال د نړیوال جام په سږنيو لوبو کې یوه خورا مهمه مسئله د فوټبالرانو او د فوټبال د مینه والو امنیت دی.
د فوټبال نړیوال جام د جولای تر ۱۵ مې نيټې پورې دوام کوي او امنیت یې یو ډېر ستونزمن کار دی.
د بدماشانو له خوا د ګډودۍ جوړولو پخوانۍ پیښې، تروریستي حملې او سیاسي کړکېچونه د دې باعث شوي چې یوولس کوربه ښارونه د امنیت د ټینګښت لپاره جدي تدابیر ونیسي.
د سیلانیانو د امنیت لپاره د امنیتي مامورینو ګومارل چې مخکې له مخکې په لوبغالو او د فوټبال د مینه والو د راټولیدو په سیمو کې لیدل کېږي یو له دې اقداماتو څخه دی.
د مسکو په ټولو متروګانو کې امنیتي دروازې نصب شوې دي.
د سانت پیترزبورګ په مترو کې له هغو سپیو کار اخیستل کېږي چې چاودېدونکي مواد کشفولای شي.
نندارچیان پر ټکټ سربیره یا باید د فوټبال د مینه والو ځانګړی پاسپورټ یا هم خاص کارت ولري څو لوبغالي ته د ننوتو اجازه ورکړل شي.
دا خاص کارتونه د لانجمنو خلکو او بدماشانو د تور فهرست له کنټرول وروسته د فوټبال مینه والو ته ورکول کېږي.
همدا کارتونه په حقیقت کې د روسیې قلمرو ته د ننوتو د ویزې په توګه هم کارول کېږي.
لوبغالي ته له ننوتو مخکې درې امنیتي پړاوونه شته چې لومړی یې له څرخیدونکې دروازې، دوهم د لاسي بکسونو له تلاشۍ او دریم له بدني تلاشۍ تېریدل دي.
لوبغالی د ډېرو امنیتي کمرو په وسیله څارل کېږي.
په فرانسه کې د ۲۰۱۶ کال د اروپا د جام په لوبو کې د انګلستان او روسیې د ټیمونو د پلویانو د نښتو په څیر د ورته پېښو د تکرار د مخنیوي په مقصد د روسیې پولیسو د تلاشۍ او جنايي څيړنو عملیات ترسره کړي او حتی ځینې کسان یې نیولي هم دي.
د روسیې امنیتي ادارو، د هغو بدماشانو تور فهرست برابر کړی دی چې لوبغالو ته د ننوتو حق نه لري.
د وسلو او د چاودېدونکو او زهري موادو پر خرڅلاو جدي بندیز لګول شوی دی.
د لوبو په کوربه ښارونو کې پر اعتراضیه غونډو ممنوعیت اعلان شوی او دې ښارونو ته پروازنه هم محدود شوي دي.
او بالاخره ټول هغه پارسلونه کنټرولېږي چې د لوبو په کوربه ښارونو کې آدرسونو ته استول کېږي.