د هغو شااوخوا ۶۳۰ پناه غوښتونکو چې په مدیترانې سمندرګي کې ژغورل شوي وو، لومړنۍ کښتۍ یې نن یکشنبه اسپانیا ته ورسېده.
دغه پناه غوښتونکي چې د ایټالیا د ساحلي ګارډ دوو کښتیو بدرګه کوله، د اسپانیا جنوب ختیځ والینسیا ښار ته نن سهار وختي ورسېدل او له ۲ زرو زیاتو کسانو یې هرکلی وکړ.
ټول ژغورل شوي په ۳ کښتیو کې اسپانیا ته انتقالېږي.
د دغو ۲ زرو تنو په منځ کې ۱۰۰۰ تنه د سره صلیب رضاکاران او ۴۷۰ ژباړونکي دي.
دغه پناه غوښتونکي چې اکثره یې د افریقا دي، خو د هغوی په منځ کې افغانان، پاکستانیان او بنګالیان هم شامل دي، تېره اوونۍ د اکواریس په نوم د ېوې فرانسوۍ مرستندویې ډلې د کښتۍ له خوا د مدیترانې له سمندرګي ژغورل شوي وو.
د والینسیا په بندر کې پر یوه ستره لوحه په بېلابېلو ژبو د پناه غوښتونکو لپاره لیکل شوي چې «خپل کور ته ښه راغلاست.»
وروسته له دې چې د پناه غوښتونکو ژغورل شوې بېړۍ اکواریوس ته ایټالیا اجازه ورنه کړه، پر دې مسئلې په اروپا کې د مهاجرو پر سر ژور اختلاف پیدا شو.
ایټالیا چې د مدیترانې له لارې اروپا ته په تېره بیا د افریقایي هېوادونو د تلونکو کډوالو او پناه غوښتونکو دروند بار ته یې اوږه ورکړې، د دې هېواد نوي پپولیست حکومت د دغو پناه غوښتونکو له منلو ډډه وکړه او داسې استدلال یې کاوه چې هغوی د مدیترانې د اوبو په هغه برخه کې ژغورل شوي چې مالتا ته نېږدې ده او هغه هېواد یې باید ومني.
مالتا هم د دغو ژغورل شويو پناه غوښتونکو له اخیستو ډډه وکړه او دواړو هېوادونو یو بل له بشري او د اروپایي ټولنې له مسؤلیتونو په ځان ایستلو تورن کړل.
بالاخره اسپانیا دې کار ته ور ودانګل او د یوه سیاسي حرکت په توګه یې اعلان وکړ چې دغه ژغورل شوي پناه غوښتونکي مني.
د اسپانیا د بهرنیو چارو وزیر جوزیف بوریل وویل، دا کار د دې لپاره کوي چې اروپا خپل مسؤلیت پرځای کړي او د ګډې پالېسې له لارې د کډوالو د ستونزې غم وخوري.